Policia ka arrestuar gjatë operacionit policor të koduar “Plazhi”, shtetasen në kërkim Marsida Qatja, 33 vjeçe, banuese në Kavajë, e dënuar me 2 vjet burgim, për veprën penale “Përshtatja e lokalit për përdorim droge”.
Në vitin 2019, kjo shtetase ka përshtatur për përdorim droge, një ambient, në të cilën, për shkak të konsumimit të lëndëve narkotike, ka humbur jetën një shtetas.
Materialet i kaluan Prokurorisë, për veprime të mëtejshme procedurale.
Qatja ka qenë një emër shumë i lakuar në media në 2019, pasi veç akuzave që rëndojnë mbi të, në banesën e saj ndodhi një krim.
Kujtojmë se në banesën e 33-vjeçares mbeti i vrarë Dritan Haxholli nga shefi i sigurisë së burgut Durrës Bledar Toçi.
Ngjarja e rëndë ka ndodhur në 10 tetor 2019 në qytetin e Kavajës, ku brenda në banesën e Marsida Qatjas, ishin grumbulluar disa persona mes të cilëve dhe Bledar Toçi, të cilët po konsumonin kokainë.
Por nuk ka kaluar shumë, kur në ambientet e jashtme të apartamentit të Qatjas në katin e parë, është shfaqur Dritan Haxholli, i cili ka dashur të takojë me çdo kusht Marsida Qatjan, me të cilën kishte pasuar marëdhënie intime.
Por me vete Haxholli ka pasur dhe një automatik kallashnikov dhe pasi ka parë Bledar Toçin brenda në banesë ka hapur zjarr në drejtim të tij dy herë, ku një nga plumbat e ka kapur në qafë Toçin.
Ky i fundit që kishte me vete dhe armën e shërbimit, një pistoletë tip “Glock”, ka qëlluar plot 16 herë, duke lënë të vdekur brenda në banesën e Marsida Qatjas, Dritan Haxhollin.
Policia në vendgjarje gjeti një pellg gjaku në dyshemenë e apartamentit, ndërkohë sekuestroi sasinë e kokainës në pjata, armët e zjarrit dhe gëzhojat.
