Monopoli i kryerjes së tamponit për koronavirusin po i shkakton kosto të mëdha xhepave të qytetarëve të Kosovës.
Ndonëse autoritetet kanë licencuar dy laboratorë për kryerjen e tamponit, momentalisht është vetëm “Medical & Laboratory Services” që po kryen teste PCR.
Siç raporton Gazeta Express, laboratori në fjalë është në pronësi të vajzës së biznesmenit Blerim Devolli.
Një ndër fenomenet më negative në rastet e tregjeve monopol është rritja e çmimeve dhe duket se nga kjo qytetarët e Kosovës janë duke vuajtur ndjeshëm.
Mësohet se çmimi i tamponit për koronavirusin në laboratorin e vajzës së Blerim Devollit kushton jo pak, por 200 euro.
Në lidhje me këtë, qytetari Izet Berisha e ka publikuar në llogarinë e tij në rrjetin social Facebook një faturë për test PCR, të lëshuar nga laboratori i Vlera Devollit.
“Çfarë turpi”, ka shkruar ai, duke iu referuar çmimit prej 200 eurosh që ka caktuar laboratori i Devollit për testin për Covid-19.
