Veseli: Me Trumpin president, do të pranohemi edhe në OKB (VIDEO)
Kryetari i Kuvendit të Kosovës, Kadri Veseli, duket të jetë optimist për përkrahjen e presidentit të ri amerikan, Donald Trump.

Veseli sot ka publikuar një fotografi me Trumpin, duke u bërë lideri i parë shqiptar që takon presidentin e shtetit më të fuqishëm në botë.

Në një deklaratë para kamerës së "Ekonomia Online", kryeparlamentari Veseli ka shprehur bindjen se me Trumpin president, Kosova do të finalizojë formalizimin e shtetësisë.

Madje, ai bën një paralajmërim optimist: "Kosova do të pranohet në Organizatën e Kombeve të Bashkuara, pikërisht nga përkrahja e ShBA-së dhe e këtij presidenti".

Kreu i Kuvendit ka shpalosur detaje nga takimi i parë me presidentin e zgjedhur të Amerikës, gjatë Lutjeve të Mëngjesit.

"Temë e takimit ka qenë përkrahja. Mesazhi i tij ka qenë se populli i Kosovës do ta ketë përkrahjen e ShBA-së dhe administratës së tij".

"Kosova si shtet i pavarur dhe sovran dhe populli i Kosovës do të kenë përkrahjen e fuqishme të ShBA-së, të udhëhequr nga Trump si president. Kjo po konfirmohet çdo ditë nga kjo e fundit.

Jam i sigurt se më një përkushtim dhe përkrahje të tillë Kosova gjatë këtij mandati presidencial do të ketë edhe momente më të larta, kulmimin formal të shtetit të Kosovës në pranimin e Organizatave të Kombeve të Bashkuara.

Me presidentin e vjetër Bush ka filluar një përkrahje për Kosovën. Që nga ajo kohë, në fillim të viteve 1990-të, me presidentin Clinton ka kulmuar liria e Kosovës, përkatësisht çlirimi.

Me presidentin e ri, Bush, ka kulmuar shpallja e shtetit të pavarur dhe sovran; pastaj me presidentin Obama shtetbërja e Kosovës, për të ardhur, jam i sigurt në finalizimin e formalizimit të shtetit tonë, pranimin në Organizatën e Kombeve të Bashkuara, pikërisht nga përkrahja e ShBA-së dhe këtij presidenti – Donald Trump", ka deklaruar Veseli.

Më tej Veseli ka theksuar se populli i Kosovës dhe Kosova është vend i bekuar, jemi vend i vogël të kemi një përkrahje të tillë.

"Është nder dhe privilegj, si përfaqësues i popullit tënd, të arrish të takosh presidentin e Shteteve të Bashkuara të Amerikës, të sapozgjedhurin president Donald Trump.

Është nder dhe krenari, edhe më madhe për popullin tim, sepse unë kam shkuar si përfaqësues i popullit tim dhe në të njëjtën kohë pritja që më është bërë, më është bërë duke iu falënderuar edhe përkushtimit, përkatësisht orientimit pro-amerikan të popullit të Kosovës", ka thënë Veseli. /albeu.com/
Shtuar më 22/02/2017, ora 16:42

Shkruani komentin tuaj!
Të fundit nga kjo kategori