Banorët në Bulqizë dëbojnë kryetarin e bashkisë nga dëgjesa për shfrytëzimin e pyjeve (VIDEO)
Banorët e Njësisë Administrative Fushë – Bulqizë kanë dëbuar kryetarin e bashkisë së Bulqizës dhe përfaqësuesit e firmës që kërkon të shfrytëzojë pyjet e kësaj zone.

Bashkia kishte kërkuar një dëgjesë me banorët e tri fshatrave, pas protestave të vazhdueshme të këtyre të fundit për ndalimin e shfrytëzimit të pyjeve.

Z. Melaim Damzi shoqëruar nga Drejtori i Shërbimit Pyjor Bulqizë, përfaqësuesit e firmës dhe Njësisë Administrative, është munduar t’ju shpjegojë dobinë që do të sillte shfrytëzimi i kësaj zone pyjore.

Banorët në shenjë proteste e kanë bojkotuar takimin, duke i kërkuar zotit Damzi që të largohet menjëherë, pasi sipas tyre ai nuk përfaqëson interesat e tyre, por të kompanisë.

Duke i shpjeguar atij se ka vite që këtë zonë e ka lënë në harresë dhe se nuk ka zhvilluar qoftë edhe një takim me banorët, ndërsa sot zhvillon dëgjesë për shfrytëzimin e pyjeve, krah kompanisë.

Banorët u shprehën se sot ai duhej të kishte ardhur për të folur për investimet e munguara dhe jo për shfrytëzimin e pyjeve.

Banorët shprehen se në asnjë mënyrë nuk do të lejojnë prerjen e pyjeve pasi jeta e tyre është e lidhur pa zgjithshmërisht me pyjet, dhe se prerja do të shteronte ujin e pijshëm dhe vaditës.

Banorët e fshatrave Dushaj, Kodra e Danit dhe Koçaj kanë protestuar edhe më parë për ndalimin e ndërtimit të kësaj rruge që do të shfrytëzonte pyllin, shkruan Bulqiza ime.

Protestat degjeneruan deri në atë pikë sa eskavatori i firmës që po tentonte të hapte rrugën u dogj, çka solli që disa banorë të procedoheshin penalisht.

Bashkia Bulqizë nuk kishte zhvilluar asnjëherë dëgjesë me banorët, pavarësisht protestave të vazhdueshme të tyre. /albeu.com/

Shtuar më 21/07/2017, ora 22:59

Shkruani komentin tuaj!
Të fundit nga kjo kategori