Numri një i Partisë Demokratike, Lulzim Basha, ka patur një komunikim LIVE me qytetarët nga Facebook-u.
Ai ka deklaruar sot se në kohën e vështirë që po kalojmë të gjithë së bashku, autoritet qeveritare duhet të bëjnë pjesë e tyre, duke filluar me transparencë maksimale, të testimeve dhe të rritjes së numrit të testimit.
“Me këtë nivel të lartë vetëdijesimi, me vullnetin për të qëndruar në krah të njëri- tjetrit dhe me masat, ne të gjithë së bashku do ta kalojmë këtë dhe do shikojmë pas me një lloj krenarie. Autoritetet t’i përgjigjen sakrificës së qytetarëve, mjekëve, mijëra sipërmarrësve duke bërë të mundur që nëpërmjet paketës të jemi pjesë e kalimit me sukses të kësaj pandemie. Deri tani prijnë qytetarët me ndërgjegjësimin e tyre dhe mjekët.
Unë dhe PD do insistojmë në mënyrë të përditshme duke parashtruar dhe propozimet tona në mënyrë të detajuar. Koha nuk pret, jemi në garë me kohën. Kanë kaluar 3 javë nga shpalosja e parë e propozimit tonë ekonomik. Duhet të merren pa asnjë vonesë masat për t’i ardhur në ndihmë çdo shqiptari. Kjo është një kohë e jashtëzakonshme, të cilën me shumë mundësi do ta mbajmë mend gjatë por është një kohë që do e kalojmë së bashku”- tha ai.
