Një 28-vjeçare është qëlluar me armë zjarri nga bashkëshorti i saj në Fier. Nertila Furrxhiu ka mbetur e plagosur si pasojë e të shtënave.
Aktualisht e reja ndodhet në spital, ndërsa autori Robert Kotsi 49 vjeç është arrestuar nga policia.
Uniformat blu bëjnë me dije se ngjarja ka ndodhur në banesën e çiftit në lagjen “Sheq i Madh”, ku pas një konflikti autori ka plagosur të shoqen me armë zjarri pistoletë dhe është larguar.
Por arratia nuk zgjati shumë, pasi ai u arrestua. Policia ka sekuestruar në cilësinë e provës materiale arma me të cilën autori plagosi bashkëshorten e tij.
Grupi hetimor ndodhet në vendngjarje dhe në bashkëpunim me Prokurorinë vijon punën për sqarimin e plotë të rrethanave të ngjarjes.
Njoftimi i policisë
Plagosi me armë zjarri bashkëshorten dhe u largua nga vendngjarja, falë reagimit në kohë të Policisë, kapet dhe vihet në pranga autori.
Pas njoftimit të marrë se në lagjen “Sheq i Madh” ka ndodhur një plagosje me armë zjarri, shërbimet e Policisë kanë shkuar menjëherë në vendngjarje dhe nga veprimet e para hetimore, rezultoi se shtetasi R. K., 49 vjeç, pas një konflikti me bashkëshorten e tij, shtetasen N. F., 28 vjeçe, e ka plagosur atë me armë zjarri pistoletë dhe është larguar.
Shërbimet e Policisë janë vënë në ndjekje të autorit, kanë rrethuar zonën dhe falë veprimeve të shpejta operacionale, pas disa minutash, bënë të mundur kapjen dhe arrestimin në flagrancë të tij.
U sekuestrua në cilësinë e provës materiale arma me të cilën shtetasi R. K. plagosi bashkëshorten e tij.
Shtetasja N. F. ndodhet në spital, në kujdesin e mjekëve.
Grupi hetimor ndodhet në vendngjarje dhe në bashkëpunim me Prokurorinë vijon punën për sqarimin e plotë të rrethanave të ngjarjes.
/albeu.com/
