Bënin gara shpejtësie në rrugët e Durrësit, policia ndëshkon tre shoferët

Tre persona janë ndëshkuar me gjobë ne Durrës, pasi kanë bërë gara shpejtësie me automjete pa dokumente dhe kanë rrezikuar jetën e tyre dhe dëmtimin e automjeteve të tjera.

Ata janë ndëshkuar me masa adminstrative 40 000 deri në 110 000 lekë.

Njoftimi i policisë:

Durrës

Bënë gara shpejtësie, me automjete  pa dokumente dhe të pajisura ilegalisht me xhama të errët, dhe për pasojë, rrezikuan jetën e tyre dhe dëmtimin e automjeteve të tjera të parkuara në vendin ku u bë gara, si dhe  prishën qetësinë publike gjatë natës, ndëshkohen me masa adminstrative 40 000 deri në 110 000 lekë, 3 shtetas.

Si rezultat i kontrolleve të pandërprera, të ushtruara gjatë ditës dhe gjatë natës, me qëllim parandalimin, konstatimin dhe goditjen e paligjshmërive në çdo formë të shfaqjes së tyre, shërbimet e Forcës së Posaçme “Shqiponja” të DVP Durrës konstatuan një rast të organizimit të kundërligjshëm të një gare shpejtësie, në një vendparkim automjetesh dhe në disa lagje të qytetit, ndërmjet 3 drejtuesve të automjeteve.

Shërbimet e Forcës së Posaçme “Shqiponja” ndërhynë menjëherë dhe ndaluan këtë veprimtari të kundërligjshme, shoqëruan në Komisariat 3 drejtuesit e automjeteve, shtetasit O. Sh, E. D. dhe I. N., si dhe në bashkëpunim me specialistët e Qarkullimit Rrugor të DVP Durrës, ndëshkuan me masa administrative 40 000 deri në 110 000 lekë, secilin prej këtyre shtetasve, për organizimin e kësaj gare, për mungesa në dokumentacionet e automjeteve që drejtonin, për pajisjen e këtyre automjeteve me xhama të errët, në kundërshtim me Kodin Rrugor, si dhe për prishjen e qetësisë publike gjatë natës, si pasojë e zhurmave të automjeteve të tyre.

Shërbimet e Policisë Rrugore të Durrësit vijojnë monitorimin e çdo aksi rrugor të qarkut, me pajisje logjistike dhe me patrulla të paloguara.


Shtuar 1.08.2023 15:17