Në mesin e muajit prill në Porto-Romano u derdhën qindra litra naftë në det si pasojë e një aksidenti në depozitat e naftës pranë portit të hidrokarbureve në Durrës, të cilat kërcënuan burimet e ujit të pijshëm, florën dhe faunën e zonës.
Dy muaj pas ngjarjes BIRN mësoi përmes në kërkese për të drejtë informimi se Prokuroria e Durrësit ka regjistruar procedimin penal me numër 704 më datë 21 prill mbi bazën e referimit nga drejtoria vendore e policisë.
“Deri më tani dyshimet janë se ngjarja është aksidentale, po nuk përjashtohen edhe pistat e tjera të derdhjes së qëllimshme të saj, por një rezultat të plotë do ta kemi në përfundim të hetimit”, shpjegoi për BIRN prokurori i çështjes, Madrid Kullolli.
Prokuroria pohoi se kompania e cila po hetohet dhe nga depozitat e së cilës u derdh sasia e naftës është “Gega Oil”, e cila ka kallëzuar punonjësin përgjegjës për shkarkimin e naftës nga anija në depozitat e hidrokarbureve në Porto-Romano.
Hetimi i prokurorisë është fokusuar tek dyshimet për shpërdorim detyre nga punonjësi me detyrë mekanik, i ngarkuar për shkarkimin e naftës dhe mbi kompaninë, teksa hetimi po analizon përgjegjësitë e saj dhe praktikat e ndjekura vazhdimisht.
Hetimi përfshin gjithashtu veprën penale “Ndotja e ujërave”, pasi dyshohet se dhjetëra fuçi nafte u derdhën nga depozita pranë bregdetit të Durrësit.
Ndotja u konstatua përgjatë disa kilometrave në kanalet bujqësore që shërbejnë për kullimin e tokave, që dikur i përkisnin kënetës së bonifikuar të Durrësit. Kanalet shkarkohen më pas në detin Adriatik përmes hidrovorit dhe rrjedhjes së lirë drejt ligatinës së Kepit të Palit.
Inspektorati i Mjedisit në Durrës bëri me dije në muajin prill se për aksidentin në depozitat e naftës u njoftuan nga kompania, me pretendimin se i ishte dëmtuar valvula kryesore ku kalon nafta, për të cilën sipas saj u morën masat dhe u riparua.
Ekspertët e mjedisit vlerësuan se hidrokarburet janë toksike për faunën dhe se autoritet duhet të vlerësonin përqendrimin e tyre pas derdhjes së konstatuar në kanalin kullues dhe ujërat bregdetare.
“Kemi marrë në 2 herë të ndryshme mostra të lëngjeve pranë terminalit të hidrokarbureve për të matur parametrat fiziko-kimike që të njihemi me nivelin e ndotjes dhe aktualisht jemi në pritje të rezultateve laboratorike”, shpjegoi drejtuesi i hetimit, Madrid Kullolli.
Më herët përfaqësuesja e “Gega Oil” mohoi që nafta e derdhur të ishte e kompanisë së saj dhe nënvizoi se fakti se në atë kohë po shkarkohej një anije me naftë e kësaj kompanie ishte rastësi, ndërkohë që institucionet dhe Prokuroria e Durrësit pohuan se kompania ka shkaktuar ndotjen dhe po hetohet.
Ndërsa shumica e qytetit të Durrësit ishte e mbyllur në shtëpi për shkak të masave të distancimit social që synonin të parandalonin epideminë e SARS-CoV-2, banorët e lagjes që gjendet pranë portit të hidrokarbureve dhe depozitave të naftës në Porto-Romano për disa ditë mblodhën naftën në kanalin vaditës që derdhet më pas në Detin Adriatik./reporter.al
