Grupi i ekspertëve: Probleme serioze në zbulimin e të infektuarve në Shqipëri

Grupi i ekspertëve antiCOVID pranë Partisë Demokratike thotë se ka probleme serioze në zbulimin e të prekurve me COVID-19 në Shqipëri.

Në një deklaratë publike ata paraqesin rastet e dy pacientëve të shtruar në spitalin e Traumës të cilët sipas tyre në ekzaminimin me skaner rezultojnë se kanë dëmtime pulmonare karakteristike të COVID-19, por në testimin e tamponit rezultojnë negativë.

Ata dalin me një propozim me 5 pika që ka në thelb bërjen e analizave të tjera përpos tamponit si dhe decentralizmin e analizave laboratorike duke mos ja lënë atë në monopol QSUT-së, shkruan “opinion”.

Deklarata e grupit të ekspertëve antiCOVID pranë PD: “Në Qendrën e Traumës u paraqitën dy pacientë të traumatizuar. Në ekzaminimin e zakonshëm me Scaner u konstatuan dëmtime egzistuese pulmonare, karakteristike prej Covid 19.

Në testimin virusologjik (tampon) të mëtejshëm rezultojnë negativë, pra ka një mospërputhje në diagnozë.

Po të analizojmë dhe të dy rastet e mëparshme të aksidentuara nga Durrësi, gjejmë po kështu mospërputhje midis ekzaminimit Scaner dhe atij me tampon.

Në këtë situatë, vetë të dhënat e Scanerit, që janë më të besueshme flasin për probleme serioze në zbulimin e të prekurve, në ndjekjen e këtyre, difekte këto madhore që kërkojnë zgjidhje:

—Së pari, në këto raste duhet kërkim i dyfishtë virusologjik (PCR) në një laborator tjetër me ripërsëritje të ekzaminimit pas 3-5 ditësh.

Kjo normë tek ne nuk realizohet sepse gjithçka është monopol i një laboratori, edhe pse janë mundësitë e shfrytëzimit të laboratorëve të tjerë për këtë test.

—Së dyti, pamja karakteristike nga Scaneri i atij pulmoni mund të vazhdojë të qëndrojë gjatë mbas këtyre dëmtimeve virusale, pra rezultati negativ i “tamponit” nuk hedh poshtë diagnozën me Scaner, pra as gjurmimin e domosdoshëm të kontakteve, gjë që nuk po bëhet.

—Së treti këta pacientë, ashtu si dhe depistimi në tërësi, kanë nevojë për analizat imunologjike IGG, IGM dhe IGA gjë e mundshme në një numër të konsiderueshëm laboratorësh, por që me gjithë insistimin tonë vazhdon të shpallet “e ndaluar”.

Theksojmë se “justifikimi” me certifikimin nga OBSH të tyre, që po përdoret për ta bllokuar edhe këtë ekzaminim vetëm në QSUT, është i pavërtetë. Veçse sot kur ka metoda të shumta të përcaktimit të antitrupave që nga imunokromatografia deri te ELISA; kujdes me përzgjedhjen!

—Së katërti, ky fenomen i zbulimit të dëmtimeve të mushkërive prej Covid 19 nga ekzaminimet Scan për shkak të arsyeve të tjera, flet për moskorrespondimin e të dhënave zyrtare me numrin e të infektuareve në realitet, si pasojë e një niveli testimi me “tampon” shumë nën nevojat e vendit dhe mungesën e plotë të atij imunologjik, që nuk mund të tejkalohen vetëm me nga një pikë analizash.

Duhen mobilizuar me rimbursim për qytetarët, të gjitha kapacitetet laboratorike në qendër e periferi për test, test, test.

—Së pesti, zbulimi i këtyre pacientëve me dëmtime të tilla në mushkëri, pra në stade të avancuara të sëmundjes, tregon një mosfunksionim të hallkave, duke filluar nga mjeku i familjes, që duhet të shndërrohet në një nga “motorrët” kryesorë, si dhe për domosdoshmërinë e përfshirjes në këtë përballje për depistim e trajtim të të gjitha mundësive imazherike të vendit”.


Shtuar 18.04.2020 17:03