Zhdukja e pamjeve filmike nga vjedhja në thesar
Pëlqej
Persona të tjerë pritet të merren në pyetje nga Prokuroria lidhur me skandalin e vjedhjes së 713 milionë lekëve nga dy arkat e Thesarit të Bankës së Shqipërisë. Prokuroria ka marrë në dorëzim në fund të korrikut vetëm regjistrimet e një muaji. Specialistët e bankës u kanë pohuar përfaqësuesve të organit të akuzës se sistemi i kamerave në Bankë ka kapacitet për të mbajtur vetëm 30 ditë regjistrime.

Pas mbushjes së hapësirës së memories, sistemi fshin vetë automatikisht ditët paraardhëse duke ruajtur 30 ditët e fundit. Ky fakt duket se pengon hetimin e prokurorisë, e cila dyshon se vjedhja e 713 milionë lekëve nga banka ka ndodhur së paku gjatë vitit të fundit. Në dëshminë e tij, Ardian Bitraj, ish-përgjegjës i arkës stok, i akuzuar direkt për vjedhjen, ka thënë se krimi ka zgjatur katër vjet. Javën e kaluar një burim i prokurorisë konfirmoi se grupi i hetimit do t’i kërkonte bankës të dhëna për çështjen e kamerave të sigurisë.

Konkretisht, prokuroria kërkoi “personat përgjegjës” që kanë instaluar sistemin dhe që më pas kanë pasur për detyrë mbarëvajtjen e funksionimit të tij. Fillimisht u mendua se instalimi i kamerave dhe serverit të lidhur me to ishte bërë nga një kompani private, por sipas prokurorisë, e vërteta është ndryshe. Burimet nga organi i akuzës kanë bërë me dije për gazetën “Panorama” se pas blerjes së serverit dhe të pajisjeve të tjera, sistemi është instaluar dhe mirëmbahej nga punonjës të Bankës së Shqipërisë.

Verifikimi ka zbuluar faktin se kanë qenë punonjës të sigurisë dhe teknikës që kanë konfiguruar sistemin e kamerave në fjalë. /albeu.com/
Shtuar më 21/08/2014, ora 10:27
Shkruani komentin tuaj!
Të fundit nga kjo kategori