Zgjohu dhe historianet reagojne per kishen e Gruevskit
Albeu.com
Lëvizja Qytetare ZGJOHU! dhe Shoqata e Historianëve Shqiptar në Maqedoni shprehin brengosje dhe keqardhje të thellë lidhur me reagimin e VMRO DPMNE me të cilën justifikon ndërtimin skandaloz të kishës ortodokse që ka ...... shkaktuar shumë polemika dhe që ndërtohet në një vend në të cilin ajo asnjëherë nuk ka ekzistuar. Vendndodhja e kishës Shën Konstantini dhe Elena ka qenë në mes të qendrës tregëtare, afër hotelit Holiday Inn. Ndërsa lokacioni i përzgjedhur për ta rindërtuar këtë kishë paraqet vendndodhjen e shtëpisë së lindjes së nobelistës Gonxhe Bojaxhiu.

Për 2 vite me rradhë kemi shprehur shqetësimin tonë me vendimin e përngutur të qeverisë së Republikës së Maqedonisë për ndërtimin e një kishe ortodokse në sheshin qendror të Shkupit me mjete buxhetore dhe mbi themelet e shtëpisë së Nënës Terezë. Atëbotë, krahas shumë OJQve, fushatës së ZGJOHU! iu bashkangjitën edhe partitë politike BDI, BDSH, BDK dhe AK të cilat e dënuan këtë akt të qeverisë duke e kualifikuar si "tendencë për zhbërjen e elementeve shqiptare nga kryeqendra".
Shqetësimet tona dhe të partive politike shqiptare u njohën nga Selia e Shenjtë e Kishës Katolike në Vatikan dhe zunë vend në Raportin e Departmentit të Shtetit Amerikan për liritë fetare.
Ky vendim, ngjashëm me atë të zhvendosjes së shtëpisë së Nënës Terezë si pjesë e strategjisë për ndërtimin e kishës ortodokse, Ligjit diskriminues dhe përjashtues për Natalitet, turnet etnike në Strugë, ndërtimit të filharmonisë mbi themelet e Ibni Pajko Xhamisë, inaugurimit të objekteve të karakterit publik vetëm me klerik ortodoks, vendosjes dhe mirëmbajtjes së kryqit të stërmadh në malin Vodno me mjete buxhetore, anashkalimin e Burmali Xhamisë, gërmimet tendencioze dhe përjashtuese në kështjellat e Shkupit dhe të Ohrit , rrënimin prej kohësh të kishës katolike në Shkup, nuk është kontribut në ndërtimin e mirëbesimit mes komuniteteve, ndaj dërgon sinjale negative për vet qytetarët e Shkupit shumëetnik dhe shumëfetar që si i tillë u përket të gjithëve.
Në këtë vazhdë, duke i parë këto veprime si hapa drejt një kaosi dhe ndarjeje të panevojshme që vështirë riparohet, Lëvizja ZGJOHU! apelon deri te partitë politike shqiptare që të mbeten parimore deri në fund dhe të flasin me një zë në mbrojtje të trashëgimisë tonë kulturore dhe shpirtërore dhe për këtë do t'i përkujtojmë vazhdimisht, ndërsa ne, përfaqësuesit e shoqërisë civile, do të nisim një koalicionim të gjërë për t'a rrëxuar edhe këtë nismë para Gjykatës Kushtetuese me qëllim të parandalimit të acarimit të mëtutjeshëm dhe në mbrojtje të karakterit multietnik dhe multifetar të vendit. (lajm)
Shtuar më 22/04/2009, ora 20:03
Tage: arkiv

Shkruani komentin tuaj!
Të fundit nga kjo kategori