Zbardhet shkaku pse gjimnazisti rrahu drejtorin dhe nëndrejtoreshën
Një 18-vjeçar, maturant në Shkollën e mesme të Bashkuar të Farkës së Madhe në Tiranë, është arrestuar dy ditë më parë nga Policia, pasi akuzohet se ka rrahur drejtorin dhe nëndrejtoreshën e shkollës.

Burime nga Policia thanë se ngjarja dyshohet të ketë ndodhur pas një paralajmërimi që i është bërë adoleshentit, për shkak të mungesave të shumta që kishte bërë në shkollë.

Për këtë arsye, sapo i është dhënë paralajmërimi, ai ka shkuar në zyrën e drejtorit, shtetasit me iniciale Xh.Q., 56 vjeç, dhe ka nisur t’i kërkojë shpjegime me tone të larta, raporton “Panorama”.

Biseda është dëgjuar nga nëndrejtoresha, e cila ka ndërhyrë duke u futur në zyrën e drejtorit, në mënyrë që të ulte tensionet. Por në këtë moment ajo është përballur me një lumë fyerjesh nga maturanti, i cili madje nuk ka ngurruar edhe që ta godasë.
Burime nga Policia thanë se shtetasi i arrestuar, Aldo Troksi, ka goditur me një kapëse letrash që ka marrë nga tavolina, drejtorin dhe nëndrejtoreshën, shtetasen O.I., 36 vjeçe.

Është dashur ndërhyrja e mësueses kujdestare të adoleshentit, po edhe e mësuesve të tjerë, që autori të dilte nga zyra drejtorit, pasi ai vijonte me fyerje e kërcënime ndaj tyre. Në këtë kohë, drejtori, Xh.Q., ka lajmëruar Policinë duke denoncuar incidentin që kishte ndodhur në shkollë.

Në vendngjarje janë nisur fillimisht patrullat e Postës së Farkës, që është më afër vendit të ngjarjes, më pas edhe shërbimet e Komisariatit nr.1. Adoleshenti është arrestuar në flagrancë me akuzën e goditjes për shkak të detyrës. Ndërsa nga ana e shkollës kanë nisur procedurat për përjashtimin e tij, për shkelje të rënda disiplinore./Albeu.com/
Shtuar më 04/03/2017, ora 08:49

Shkruani komentin tuaj!
Të fundit nga kjo kategori