Zbardhet debati, si nisi sherri e përplasja në Kuvendin e Shqipërisë
Pëlqej
Seanca plenare e së enjtes ka degraduar me bllokimin e foltores së parlamentit nga ana e opozitës, të cilët e shoqëruan të gjithë seancën me brohoritma “hajdutë dhe kriminelë”.

Mbledhja e Kuvendit nisi e qetë, por “ujërat u turbulluan” kur Gramoz Ruçi i preu fjalën kreut të Grupit të PD-së, Edmond Spaho, i cili nisi të flasë për rastin e ekstradimit të dëshmitarit, Nazer Seiti.

Deputetët parafolës ishin duke diskutuar për projektligjin “për sistemin parauniversitar” dhe ndërhyrja e Spahos për këtë çështje u quajt si shkelje e rregullores së Kuvendit.

Por tonet u acaruan teksa Lulzim Basha u ngrit me nerva dhe bërtiti me ton të ashpër që t’i jepej fjala Edmond Spahos, por kjo nuk funksionoi. “Ulu poshtë, mos bëj si halabak.

Mos bëj si halabak, por bëj liderin të thashë”, iu drejtua Gramoz Ruçi, kreut të PD-së. Deputetët e PD-së kanë mbajtur të bllokuar foltoren në tentativë për të mundësuar fjalën e kreut të Grupit të PD-së, Edmond Spaho.

Por Gramoz Ruçi është treguar i prerë. Ai ndërpreu seancën 3 herë dhe në fund e përjashtoi nga seanca Edmond Spahon duke i hequr dhe ditën e punës.

Por deputeti demokrat nuk u largua dhe vazhdoi të qëndrojë në parlament, edhe pse Ruçi i dha urdhër punonjësve të gardës ta nxirrnin jashtë.

Seanca ka vijuar me diskutimet e projektligjeve, ndërkohë që deputetët demokratë gjatë gjithë kohës kanë brohoritur në kor dhe kanë goditur tavolinat në shenjë proteste duke quajtur anëtarët e maxhorancës si “hajdutë dhe kriminelë”.

Seanca u tensionua teksa deputetja e PD-së, Dhurata Çupi, ka tentuar t’i heqë mikrofonin deputetit Fadil Nasufi, i cili po fliste nga vendi.

Deputeti i PS-së e ka shtyrë demokraten duke i vënë pëllëmbën në faqe, por ky gjest acaroi demokratët, të cilët janë sulur te deputeti i Beratit.

Garda ka krijuar një kordon sigurie mes grupit të PS-së dhe atij të PD-së, ndërkohë që Basha ka shkëmbyer replika me tone të larta me Ilir Beqen ,të cilit i ka thënë se duhet të përfundojë në burg.

Moment pikant gjatë seancës ishte ardhja e kryetares së LSI-së, Monika Kryemadhi, kjo e fundit ka shkuar të shtrëngojë duart me Sali Berishën, por në ato momente Kryeministri Rama ka dalë nga salla.

Por sipas Berishës, ky largim ishte shenjë frike, ndërkohë që kryetarja e LSI-së i ka treguar duke qeshur kolegëve demokratë se kishte veshur këpucë dhe jo çizme. Kreu i PD-së, Lulzim Basha, ka reaguar ashpër në një deklaratë për mediat teksa tha se qeveria i mbylli gojën dëshmitarit Nezar Seiti, i cili ishte gati të fliste.

“Skandali më i madh në 27 vjet histori është rrëmbimi i Nezar Seitit, “financierit” të bandës së Habilajve. Njeriut që ka mbajtur shënim se sa para i janë dhënë Saimir Tahirit, sa për veten e tij, sa për Edi Ramën, sa për zyrtarët e tjerë të lartë të kësaj mafia, të kësaj bando-qeverie. Dhe i cili, sipas vetë pohimeve të familjarëve të tij, ishte bërë gati të kthehej në bashkëpunëtor të drejtësisë duke i dhënë fund kështu çështjes “Tahiri -Habilaj””, tha dje Basha.

DEBATI NË PARLAMENT

Edmond Spaho: Ka ndodhur një ngjarje e paprecedent ku dëshmitari kryesor i dosjes Tahiri-Habilaj, Nazer Seiti, në kundërshtim me të gjitha përcaktimet ligjore të Republikës së Shqipërisë, është ekstraduar në drejtim të Italisë. Përcaktimet ligjore e ndalojnë ekstradimin e personave, të cilët janë arrestuar..

Gramoz Ruçi: Futu në procedurë zoti Spaho.. Ku është problemi procedurës.

(Deputetët e PD nga vendi i kërkojnë Ruçit ta lërë të flasë)

Gramoz Ruçi: Mos ma ngrini dorën mua ashtu.. mos ma ngrini dorën.. I ndërpritet fjala, është jashtë rregullores.

Edmond Spaho: Zoti kryetar po ngre një çështje shumë të rëndësishme..

Edi Paloka: Lere të flasë, ai është kryetari i grupit të PD…

Gramoz Ruçi: Fjala është për Shezai Rrokajn..

Lulzim Basha: Jepi fjalën

(shkon drejt foltores dhe ngre zërin)

Gramoz Ruçi: Ulu poshtë, ulu poshtë..

Lulzim Basha: Jepi fjalën, sillu si kryetar Parlamenti…

Gramoz Ruçi: Ulu poshtë, mos bëj si halabak ti (Bashës)…

(Basha rrethohet nga gardistët)

Lulzim Basha: Prandaj i prure hajdutët dhe kriminelët këtu… jepi fjalën..

Gramoz Ruçi: Ju paralajmëroj dhe mos i prek punonjësit e shërbimt..

Lulzim Basha: Jepi fjalën të thashë..

Gramoz Ruçi: Mos bëj si halabak, por bëj liderin të thashë.. Mos prek punonjësit e shërbimit..

Bardh Spahia: Hë more, sillu mirë tani..

Edmond Spaho: Më jep fjalën të mbaroj…

Gramoz Ruçi: Zoti Basha të paralajmëroj..

Ndërpritet seanca..

(Pas një pushimi prej 15 minutash Gramoz Ruçi rinis seancën, opozita vazhdon të mbajë të bllokuar foltoren)

Edmond Spaho: Më jep fjalën të bëj propozimin tim për ndryshimin e rendit të ditës, ndaj kam kërkuar fjalën për procedurë. Do ta argumentoj propozimin tim për rendin e ditës.

Gramoz Ruçi: Neni 42 i rregullores për procedurën thotë, çështje të procedurës janë kërkesa për ndryshimin apo plotësimin e rendit të ditës. Rendi i ditës u miratua dhe s’kishit asnjë propozim.

Edi Paloka: Do e bëj tani…Jepi fjalën të bëjë propozimin.

Lulzim Basha: Jepi fjalën, fjalën..

Ervin Salianji: Shoku Gramoz, jepi fjalën për procedurë.

Gramoz Ruçi: Uluni poshtë. Zoti Spaho po plotësohet 2 minutëshi, uluni poshtë. Atëherë, në zbatim të pikës 5 të nenit 64, ju paralajmëroj që do t’ju përjashtoj nga seanca…

Lorenc Luka: O shoku Gramoz, dënoje sipas nenit 55..

Bardh Spahia: O Gramoz nuk është parlamenti prona jote…Kaq frikë ke nga fjala mor burrë..

Gramoz Ruçi: Po ju citoj nenin 64 pika 5: Në rast se deputeti vazhdon të mbajë të zaptuar foltoren edhe pas tërheqjes së vërejtjes, përjashtohet nga seanca plenare dhe komisionet me maksimumin e nenit 65 të rregullores.

Bardh Spahia: Neni 55…

Gramoz Ruçi: Neni 65..të rregullores, po ju s’lexoni.

Ervin Salianji: Neni 55, agjitacion dhe propagandë..

Gramoz Ruçi: Sipas nenit 65 do ju jepet masa. Atëherë, masa disiplinore e përjashtimit nga seanca shoqërohet me sanksione financiare e barabartë me një ditë të pagës. Zoti Spaho, përjashtoheni nga seanca e ditës së sotshme. Pushim.

Edmond Spaho: Jeni arrogant, jeni prepotent..Të vij zor, të të vijë turp../ Panorama/
Shtuar më 02/02/2018, ora 12:32
Shkruani komentin tuaj!
Të fundit nga kjo kategori