Zbardhen shkaqet/ Ja pse u arrestua shefi i Kardiologjisë në Spitalin e Shkodrës
Policia e Shkodrës mbrëmjen e djeshme ka arrestuar shefin e Pavionit të Kardiologjisë në Spitalin Rajonal të Shkodrës, Edi Smajlaj. Ai dyshohet se ka falsifikuar dokumentet shëndetësore të pedagogut Simon Lufi, i arrestuar një ditë më parë për korrupsion pasiv.

Sipas njoftimit të policisë, arrestimi i mjekut Smajlaj u bë pas verifikimit të informacionit se në Spitalin Rajonal të Shkodrës po kryheshin veprime të jashtëligjshme në favor të personave të arrestuar.

Smajlaj, i cili gjatë dy ditëve të fundit nuk ka qenë në detyrën e mjekut të rojës, dyshohet se ka falsifikuar kartelën mjekësore për pacientin Simon Lufi, pedagog në Universitetin e Shkodrës, i arrestuar një ditë më parë nga policia.

Shefi i katedrës së historisë, Simon Lufi, pas arrestimit kishte kërkuar ndihmë mjekësore në repartin e urgjencës së spitalit. Së bashku me të, një ditë më parë, policia kishte arrestuar 9 persona dhe kishte shpallur në kërkim 5 të tjerë si të dyshuar për krijimin e një skeme korrupsioni në Universitetin e Shkodrës.

Të arrestuarit e djeshëm janë pedagogë, studentë dhe sekserë, të cilët dyshohet se bashkëpunonin duke favorizuar në provime studentë të veçantë përkundrejt shumave nga 200 deri në 700 euro./Albeu.com/

Shtuar më 24/11/2016, ora 07:39

Shkruani komentin tuaj!
Të fundit nga kjo kategori