Xhepa: Programi i Ramës me ide racionale
Ish- deputeti i Partisë Demokratike, Selami Xhepa shprehet se programi i qeverisë socialiste ka disa ide racionale dhe të dobishme, por mënyrat e arritjes janë të pamjaftueshme. Në një intervistë për gazetën Panorama, ai thotë se programi identifikon drejt si prioritete madhore të vendit integrimin evropian, luftën ndaj korrupsionit, reformat ekonomike e administrative, përfshi atë territoriale.



“Me një fjali të vetme do të thosha se programi ka objektiva të qarta të synuara, ka disa ide racionale dhe të dobishme, por mënyra e arritjes dhe burimet e disponueshme janë të pamjaftueshme. Programi identifikon drejt si prioritete madhore të vendit integrimin evropian, luftën ndaj korrupsionit, reformat ekonomike e administrative, përfshi atë territoriale. Këto kanë qenë edhe prioritetet e programit politik të PD-së gjatë dy mandateve të saj, pavarësisht nivelit të përmbushjes, që mund të jenë subjekt i një tjetër analize. Por dallimin filozofik midis dy qeverisjeve e shoh në artikulimin e qartë në programin e PD-së të nevojës për një ridimensionim të rolit të shtetit dhe raportit të tij me sundimin e forcave të tregut. Kjo është një qasje filozofikisht e re dhe e artikuluar për herë të parë në të majtën shqiptare, dhe që deri diku e ndeshim në qasjen që programi u bën disa reformave, siç janë ato të shëndetësisë, të taksimit dhe të mbrojtjes sociale,” thotë Xhepa.
Shtuar më 14/09/2013, ora 12:17
Shkruani komentin tuaj!
Të fundit nga kjo kategori