Gentian Doda është dënuar për vrasjen e dy personave 20 vite më parë, por dyshohet se një vendim i gjyqtarit të Apelit, Shkëlqim Miri e ka nxjerrë atë prej burgut pak muaj më parë.

Në lidhje me këtë, është nëna e viktimave të tij nga Burreli që i shkruan Prokurorit të Përgjithshëm duke i thënë se i kanë vrarë bashkëshortin dhe tre djem dhe ajo është e bindur se urdhri është dhënë pikërisht nga banda e drejtuar prej Gentian Dodës, i cili u ekstradua nga SHBA-të në vitin 2012.

"Unë Xhevrije Dedja banuese në Mat jam bashkëshortja e të ndjerit Fehmi Dedja dhe nëna e tre djemve të ndjerë Gëzim, Halit dhe Gazmir Dedja, të gjithë këta tashmë të vrarë për hakmarrje, xhelozi dhe inate nga dora dhe urdhrat e kësaj bande kriminale të përbërë nga vëllezërit Admir dhe Gentjan Doda si dhe bashkëpunëtorët e të rekrutruar prej tyre"., -shkruan e moshuara.

Më tej e moshuara thotë se është vënë në dijeni se në gjykatën e Matit është duke u rigjykuar i akuzuari për vrasjen e djalit të saj, i pandehuri Gentian Doda.

Ajo thotë se vëllezërit Doda akuzohen edhe për krime të kryera në Britani ku dhe i vëllai i tij po vuan dënimin për krime të ndryshme që kanë kryer në këtë shtet.