Kufizimi i lëvizjes për shkak të epidemisë së COVID-19 ka përgjysmuar numrin e veprave penale në Shqipëri, por krimet kundër personit kanë mbetur në vendnumëro, ndërsa numri i vjedhjeve ka shënuar rritje.
Sipas dy raporteve statistikore të Ministrisë së Brendshme për muajt janar dhe shkurt 2020 si edhe njoftimeve periodike Policisë së Shtetit për muajt mars – prill, veprat penale të regjistruara thuajse janë përgjysmuar gjatë periudhës së pandemisë. Për muajin janar janë regjistruar gjithsej 2,777 vepra penale; për muajin shkurt 2,685 procedime; për muajin mars janë raportuar 1479 procedime dhe për prillin rreth 1401.
Krimet kundër pasurisë, ku përfshihen gjobëvëniet, vjedhjet dhe shkatërrim i pronës kanë shënuar rritje gjatë periudhës së pandemisë. Sipas raporteve statistikore, në muajin janar janë regjistruar 63 vepra penale kundër pasurisë dhe në muajin shkurt 53 raste. Në muajin mars janë regjistruar 251 raste të vjedhjes së pronës dhe në prill 178 raste të tjera. Ndërkohë, në mars janë regjistruar edhe 39 raste të shkatërrimit të pronës dhe në muajin prill janë regjistruar 27 procedime për këtë vepër penale.
Rënie kanë shënuar veprat penale në fushën e drogave. Në janar janë regjistruar 128 procedime penale për shitje, tregtim apo trafikim të narkotikëve dhe 149 në shkurt. Ndërsa në muajin mars janë regjistruar 51 procedime dhe në prill 57.
Sipas të dhënave të publikuara nga Policia, gjatë pandemisë janë regjistruar më pak procedime edhe për trafiqet e paligjshme. Nga 123 raste në janar dhe 133 në shkurt, në muajin mars janë regjistruar 22 procedime për kalim të paligjshëm të kufirit dhe në prill 38 raste. Në statistikat mujore të policisë raportohet se në muajin janar janë kapur 1,190 emigrantë të huaj të parregullt, ndërsa në shkurt numri i tyre është rritur në 1,843.
Gjatë muajve mars dhe prill, raportimet për krimin ekonomiko-financiar kanë qenë të papërfillshme krahasuar me muajt janar dhe shkurt, kur janë raportuar përkatësisht 141 dhe 149 procedime për kontrabandë, falsifikime dhe pastrim të parave.
Edhe veprat penale kundër mjedisit, si krimi mjedisor, ndërtimi i paligjshëm apo prerje e paligjshme e pyjeve ka shënuar rënie gjatë dy muajve të fundit. Në janar rezulton të jenë evidentuar 390 raste; në shkurt 372; për muajin mars janë regjistruar 103 procedime penale për ndërtim pa leje dhe në prill 134.
Pandemia ka sjellë rënie edhe në numrin e aksidenteve rrugore; nga 163 aksidente në janar dhe 161 në shkurt, numri është ulur në 108 aksidente në mars dhe 64 në prill./ BIRN
