Kryebashkiaku Erion Veliaj zhvilloi ditën e sotme një aktivitet me fëmijët në Parkun e Liqenit paralelisht me protestën dhe marshin që shoqëria civile po kryente kundër këndit të lojërave. Gjatë fjalës së tij Veliaj theksoi se këndi i lojrave do të ndërtohet dhe do të jetë gati në 1 qershor.

"Shoqëria Civile le të monitorojë punimet dhe të shohë sa pemë do të priten për ndërtimin e këtij parku. Qyteti do të ecë përpara dhe familjet duan të rrisin fëmijët në një qytet pa dhunë. Fëmijët janë qendra e vëmendjes së Bashkisë së Tiranës", tha Veliaj.

Madje ai iu referua aktivistëve si biznesmenë që duan të frenojnë ndërtimin e këndit të lojërave për fëmijë.

"Asnjë biznesmen apo ndërtues pallatesh nuk do të mund ta ndalë ndërtimin e këndit të lojërave për fëmijët te Parku i Liqenit. Ne jemi të vendosur", tha ndër të tjera Veliaj. /albeu.com/