Vdekja e oficeres 26-vjeçare, fjalët prekëse të kolegut të saj
Ajo u nda nga jeta në lule të rinisë. Pasioni që të bëhej oficere në radhët e Policisë së Shtetit, por edhe dëshira për të jetuar, nuk i kanë mjaftuar Xhulia Zyfit, efektives e cila tre javë më parë pësoi hemorragji cerebrale në Akademinë e Sigurisë ku studionte.

Ajo ndërroi jetë këtë të premte në spital ku edhe ishte shtruar prej 5 ditësh, në gjendje kome.

26-vjecarja nga Pogradeci, kishte marrë gradën nënkomisare gjatë studimeve në Akademinë e Siguris. Së fundmi ishte emëruar në detyrën e saj të re.

Gent Mullai, shefi i Komunikimit me Median e Publikun e Zedhenes ne Drejtorine e Policise se Shtetit, i ka dedikuar nje status te gjate dhe prekes koleges.

Statusi i plotë:

U prehsh në paqe kolegia, shoqja, mikja jonë , Xhulja ZYFI.

Një tjetër efektive e Gjeneratës së re të Policisë është ndarë nga jeta, nga familja e saj , por edhe nga familja jonë e madhe, Policia e Shtetit.

I japim lamtumirën e fundit sipas protokollit atyre punonjësve të policisë që bien në detyrë e për shkak të detyrës, apo atyre që humbin jetën aksidentalisht, se kështu e përmban rregullorja e protokolli.

Por homazhi im sot shkon për Xhuljan, që Policinë e kishte ëndërr , që gjatë këtyre pak viteve që shërbeu me dinjitet nuk u ndal , por kërkoi më shumë tek vetja duke vazhduar studimet për tu bërë oficere.

Sapo u diplomua dhe natyrshëm gëzimi ishte i pamasë kur arrin me dinjitet e përkushtim të ngjitësh shkallët e karrierës, një fatkeqësi shëndetësore i ndërpreu gëzimin, i ngriu buzëqeshjen në buzë.

Kolegët e koleget e saj i qëndruan pranë në spital me shpresën se do rikthehej përsëri në familjen tonë të madhe, por Zoti donte ta merrte me vete dhe e mori.

U prehsh në paqe Xhulja.

Nuk janë vetëm Dëshmorët burim frymëzimi për Gjeneratën e Re dhe për tërë Policinë në tërësi, por janë edhe këto shembuj të dinjitetit e personalitetit, të këmbënguljes për të ecur përpara , për të qenë sa më i dobishëm për shoqërinë, shembuj që frymëzojnë Gjeneratën e Re , si të ecë në rrugën e drejtë, të moralit, sakrificës , ndershmërisë, karrierës dhe si të shndërrohen në punonjës policie shembull për tu adhuruar nga komuniteti ku ata shërbejnë.

Gjatë viteve të fundit në pozicionin e Zëdhënësit të Policisë së Shtetit kam patur mundësinë të njoh pothuajse të tërë djemtë e vajzat e Gjeneratës së Re të Policisë së Shtetit.

Të njihja Edisonin, 26 vjeçarin nga Korça, që iu ndërpre jeta si pasojë e një sëmundje të rëndë.

Të njihja Paranxhelën, 23 vjeçaren nga Durrësi e Jeroldinën , 23 vjeçaren nga Saranda, që u ndanë nga jeta krejt papritur , duke marrë një vendim ekstrem për jetën e tyre.

Polic e police shembull në punë e në shoqëri që me ikjen e tyre nga kjo jetë shkaktuan shumë dhimbje jo vetëm tek familja e tyre por tek të gjithë ne. Zoti ju donte pranë.

Punonjësi i Policisë është njeri me gjak, me ndjenja, si çdo pjesëtar tjetër i shoqërisë. Edhe ne kemi halle, probleme, gëzime hidhërime, edhe ne gabojmë e s’jemi të përkryer.

Edhe ne rritemi e zhvillohemi në përpjestim të drejtë me zhvillimin shoqëror të vendit, e më shpejt e më mirë se ky zhvillim.

Shpesh akuzohemi e sulmohemi pa të drejtë, etiketohemi si bandë e lloj – lloj epitetesh.

Por mos harroni lodhjen, mundin, djersën, përkushtimin, privimin nga shumë gjëra, rrezikun e sakrificën që bëjnë punonjësit e Policisë të Shtetit.

Mos harroni se këta djem e vazja, burra e gra, sakrifkojnë shumë nga vetja e familja e tyre për ti shërbyer me dinjitet familjes së madhe, shoqërisë ku bëjnë pjesë.

Mos harroni se në Policinë e Shtetit punojnë me ndershmëri e përkushtim mijëra djem e vajza, burra e gra.

Dua ta mbyll me një premtim për familjarët e të gjithë punonjësve që largohen fizikisht nga jeta, nga familja jonë e madhe, se derën e kësaj shtëpie të përbashkët do ta keni përherë hapur. /albeu.com/
Shtuar më 03/06/2017, ora 20:10

Shkruani komentin tuaj!
Të fundit nga kjo kategori