Mundësia e një koalicioni PS-LSI nuk përjashtohet as nga deputeti socialist, Bashkim Fino dhe as nga nënkryetari i LSI-së, Petrit Vasili, të cilët lanë dje të hapur mundësinë e një aleance të tillë.

"LSI është pjesë e një marrëveshjeje politike, e cila e ka zbatuar me korrektesë dhe do ta përmbushë përsëri me korrektesë. Në momentet parazgjedhore do të ndodhë një vlerësim i gjithçkaje që ka ndodhur, të funksionit, të rezultateve të prodhuara, performacën politike, perceptimit dhe ndjesive që anëtarësia ka. Forumet dhe anëtarësia e LSI-së do të vendosë mbi strategjinë elektorale të ardhshme të zgjedhjeve të vitit 2013", deklaroi Vasili "Albanian Screen".

Edhe Sekretari për pushtetin vendor i PS-së, Bashkim Fino, konfirmoi se Partia Socaliste ka nisur lëvizjet për zgjerimin e koaliconit opozitar.

"Në qoftë se çdo forcë politike, që ka si qëllim final rrëzimin e kësaj qeverie dhe që bashkohet pak a shumë në programet tona, ne jemi të hapur për ta zgjeruar koalicionin dhe nuk mund t’i mbyllim derën asnjë force politike që kërkon të rreshtohet në grupimin tonë për zgjedhjet e ardhshme 2013", deklaroi Fino për "AS".

Ndërkohë nënkryetari i LSI-së i është përgjigjur dje edhe qëndrimeve të kryetares së Kuvendit, Jozefina Topalli, sipas së cilës, Partia Demokratike mund të fitojë zgjedhjet e vitit të ardhshëm edhe pa qenë në koalicion me LSI.

"Ka qenë një vendim jo i lehtë për të bërë pjesë në një aleancë me Partinë Demokratike. Interesat e vendit dhe të integrimit na e imponuan atë kohë këtë vendim dhe asnjë në LSI nuk ka asnjë dilem për drejtësinë e këtij vendimi. Korrektesa jonë ka qenë pa asnjë te metë, korrektesë që na ka shoqëruar dhe në zgjedhjet e vitit 2011, pa të cilën disa objektiva elektorale të maxhorancës nuk do të realizoheshin", deklaroi Vasili.

Ndërsa nga ana tjetër, deputeti i PS-së, Bashkim Fino u shpreh optimist se socialistët do të udhëheqin një kaolicion të madh në zgjedhjet e vitit 2013.

"Ne i kemi dhënë mesazhet, i ka dhënë kryetari i kemi dhënë dhe ne. Natyrisht që është shumë herët për të thënë, por mesazhet janë inkurajuese dhe për një bashkëçunim të përgjithshëm", u shpreh deputeti i PS-së. /albeu.com/