Udhëtime në kohë pandemie, Turqia merr vendimin e rëndësishëm
Ambasada shqiptare në Turqi ka publikuar të dhënat lidhur me vendimin e fundit që ka marrë ky shtet, për udhetimet në Turqi, për shkak të pandemisë së koronavirusit.

“Me qëllim kontrollin e numrit të rasteve të COVID-19 dhe në kuadër të masave të reja në Turqi; të gjithë ata që do të udhëtojnë drejt Turqisë në rrugë ajrore (me avion), duke filluar nga data 28/12/2020; dhe nëpërmjet rrugëve tokësore apo detare që nga 30/12/2020, para hyrjes së tyre në vend duhet të jenë të pajisur me rezultatin negativ të testit SARS-CoV-2 PCR të kryerë brenda shtatëdhjetë e dy orëve (72 orë) të fundit”, thuhet në njoftim.

Ata që nuk kanë një test PCR negativ “nuk do të lejohen të hipin në avion për të udhëtuar në Turqi” theksohet në njoftim.

“Pra, për udhëtimin në rrugë ajrore, testi negativ është kusht të paraqitet në momentin e udhëtimit.

Sa i përket udhëtimit në rrugë tokësore apo detare, nëse udhëtarët nuk paraqesin testin negativ tek autoritetet zyrtare gjatë hyrjes në pikat kufitare, është kusht të karantinohen në adresën që do të deklarojnë (shtëpi, hotel, etj). Në rast se nuk kanë një vend për të qëndruar, duhet të karantinohen në vendet që do të përcaktohen nga Drejtoritë e Shëndetit Krahinor. Në fund të 7 ditëve karantinë, do t’u kryehet testi PCR, dhe sipas rezultatit karantina 7-ditore do të përfundojë, ose do të vazhdojë trajtimi i tyre më tej në përputhje me Udhëzimet e Ministrisë së Shëndetësisë turke”.

Ajo që ka rëndësi është se ky rregull do të vazhdojë të zbatohet “deri më 1 mars 2021″.

Shtuar më 26/12/2020, ora 12:34

Shkruani komentin tuaj!
Të fundit nga kjo kategori