Presidenti i Republikës, Bamir Topi dekoroi të mërkurën “CATS College” të Kembrixhit me “Medaljen e Mirënjohjes” me motivacionin “Për kontributin e dhënë në edukimin e nxënësve shqiptarë me kulturën britanike e evropiane”.

Sipas zyrës së shtypit pranë presidencës, Topi dorëzoi "Medaljen e Mirënjohjes" në një ceremoni të zhvilluar në Universitetin e Kembrixhit, në praninë e drejtuesve më të lartë dhe trupës pedagogjike të këtij institucioni të rëndësishëm akademik të Mbretërisë së Bashkuar e njëkohësisht nga më të shquarit në botë.

Presidenti Topi vlerësoi lart rezultatet e shkëlqyera të arritura nga studentët shqiptarë, të cilët i inkurajoi të japin kontributin e tyre në ndërtimin e së ardhmes evropiane të Shqipërisë. /albeu.com/