Topi: FRD mbështet Reformën Territoriale, jo për qëllime elektorale
Pëlqej
Bamir Topi, ka deklaruar se FRD mbështet Reformën Administrativo-Territoriale, ndërsa ka ftuar opozitën e vendit të marrë pjesë në ndarjen e re.

“FRD mbështet në parim reformën dhe ndarjen territoriale. Ky proces, duhet të fillojë të menaxhohet në mënyrë europiane. Jam i bindur se do të jetë një punë shumë e vështirë, por gjëja më e rëndësishme do të ishte që faktorët politikë, e veçanërisht opozita të kontribuojë që ndarja territoriale të vijë sa më shpejt”, tha Topi.

Kreu i Frymës së Re Demokratike u shpreh më tej se e ka lançuar këtë ide dhe ka bërë apelin e tij, që në kohën kur ishte kryetar shteti për nevojën e një Reforme Territoriale, e cila u miratua dje në Kuvend.

“Ne jemi një faktor ekstra parlamentar, që nuk marrim pjesë me votë, por jemi një parti që brenda nesh ka një mendim. Mendimi i FRD është shumë më i vlefshëm se mendimi i atyre partive, që janë pengje të liderve të partive”, tha Topi.

Ai bëri me dije se kjo parti ka shprehur dakortësinë për Reformën Territoriale, por është shprehur se kjo reformë ka pasur problemet e veta. “Nisi me transparencë të dukshme dhe përfundoi me mungesën totale të pjesëmarrjes së opozitës institucionale në parlament, që shënon një stad negativ të komunikimit institucional.

Të mos marrësh pjesë në votim, do të thotë të braktisësh interesat e njerëzve që kanë votuar dhe duan të qeverisen. Pas 23 vitesh, procesi është akoma në ajër. Jemi një vend i vogël, ku gjërat mund të mbyllen brenda një viti, por ka 23 vjet që po futemi akoma në kaos”, u shpreh Bamir Topi. /albeu.com/
Shtuar më 01/08/2014, ora 11:07
Shkruani komentin tuaj!
Të fundit nga kjo kategori