Tirana blindohet për 3 orë me ardhjen e John Kerry-t
Policia e Tiranës ka marrë masa shtesë të një niveli maksimal, për të garantuar mbarëvajtjen e vizitës së zyrtarit të lartë amerikan John Kerry në Tiranë. Vizita 3 orëshe e Sekretarit Amerikan të Shtetit John Kerry në kryeqytet ditën e dielë, pritet të shoqërohet me masa të forta sigurie.

Që pas uljes së avionit të tij në Aeroportin e Rinasit, rreth orës 09:00 të mëngjesit, ku do të pritet nga kreu i shtetit Bujar Nishani, disa nga rrugët kryesore të kryeqytetit do të bllokohen deri në përfundimin e vizitës.

Duke nisur që nga Qafë-Kashari, në vijim, pjesa e autostradës Tiranë-Durres, segmenti i Laprakës, Rruga e Durrësit dhe Bulevardi Dëshmorët e Kombit do të bllokohen plotësisht si për mjetet ashtu edhe për këmbësorët.

Po në keto akse nuk do te lejohet parkimi i makinave, ndërsa burime nga policia bëjnë me dije se do të devijohet trafiku edhe për mjetet e transportit publik.

Po ashtu të gjitha rrugët do të patrullohen në të dyja krahët nga qindra efektivë të Policisë së Tiranës dhe Gardës së Republikës.

Eskorta e sekretarit Kerry, pritet të shoqërohet nga Rinasi drejt kryeqytetit nga nje helikopter i ushtrisë, i cili do të monitorojë situatën nga ajri. /albeu.com/

Shtuar më 12/02/2016, ora 15:16
Shkruani komentin tuaj!
Të fundit nga kjo kategori