Thaci merr mbështetjen e autoriteteve sllovene
Albeu.com
Kryeministri i Republikës së Kosovës, Hashim Thaçi, ka falenderuar autoritetet sllovene për mbshtetjen që kanë treguar në njohjen e Kosovës nga ndërkombëtarët.Ai ndodhet për një vizitë në Slloveni, ku dhe zhvilloi dy takime të veçanta me kryeministrin e Sllovenisë, Janez Jansha dhe me ministrin e Jashtëm slloven, Dimitri Rupel.

Zyra për shtyp pranë kryeministrisë bën të ditur se Thaçi mori vlerësime për sukseset e arritura në Kosovë, që, siç thuhet në njoftim "janë suksese të përbashkët të institucioneve kosovare dhe bashkësisë ndërkombëtare".

Ai falenderoi kryeministrin Jansha dhe ministrin e Jashtëm Rupel, për mbështetjen e ofruar për njohjen ndërkombëtare të shtetit të Kosovës dhe vlerësoi rolin e Sllovenisë si kryesuese e radhës e presidencës së BE-së në funksion të afirmimit të arritjeve të institucioneve të Kosovës.

Kryeministri slloven dhe ministri i jashtëm përsëritën gatishmërinë e Sllovenisë për të mbështetur Kosovën në rrugën e saj drejt integrimeve euroatlantike. Në takimet e kryeministrit të Kosovës me udhëheqësit më të lartë të shtetit slloven u diskutua edhe për procesin e tranzicionit në Kosovë, për vendosjen e misionit të BE-së në Kosovë, për hyrjen në fuqi të Kushtetutës së shtetit të Kosovës dhe për marrjen e përgjegjësive nga institucionet e vendit. (start)
Shtuar më 10/05/2008, ora 08:09
Tage: arkiv
Shkruani komentin tuaj!
Të fundit nga kjo kategori