Kryetari i Partisë Socialiste Edi Rama përsëriti se opozita shqiptare nuk do të bëhet pjesë e reformës zgjedhore për sa kohë nuk janë hetuar zgjedhjet e 28 qershorit 2009.

Në një konferencë shtypi Rama i bëri thirrje kryeministrit Berisha të japë përgjigje për ofertën e re të opozitës duke theksuar se pa u dhënë një përgjigje Partia Socialiste nuk do të marrë pjesë në asnjë tryezë për ndryshimet në reformën zgjedhore.

“Berisha ka dështuar për fshehjen e së vërtetës për krizën politike. Ai vazhdon të dëshmojë që qeveria nuk është e gatshme të zgjidhë këtë krizë prandaj oferta jonë është e vetmja jonë për t`i dhënë fund zgjidhjes së krizë politike” tha Rama.

Ai kërkoi që të nisë menjëherë hetimi i materialeve zgjedhore duke i bërë thirrje kryeministrit Berisha t`i hapë rrugë hetimit të zgjedhjeve për t`i hapur rrugë sipas tij reformës zgjedhore.

“Pa hetuar zgjedhjet s`ka reformë zgjedhore dhe s`ka as zgjedhje të mundshme në Shqipëri” vijoi Rama duke nënvizuar se PS dhe “Opozita e Bashkuar” është shpresa e vetme për një qeverisje më të mirë.