Tani kerkohet doreheqja e Todorovit dhe Qazimit
Albeu.com
Ministri i Arsimit Nikolla Todorov, sot nuk deshi të komentojë vendimin e Gjykatës Kushtetuese për anulimin e vendimit për mësimin e maqedonishtes që nga klasa e parë për nxënësit jomaqedonas.Todorov tha se tani radhën e kanë ekspertët e të drejtës kushtetuese që të japin mendimin e tyre për këtë çështje. Ai gjithsesi do të respektojë vendimin e marrë nga Kushtetuesja. “Mbrëmë unë u përgjigja në detaje të gjitha pyetjeve tuaja dhe mendoj se do të ishte mirë të bisedoni për këtë temë edhe me ekspertë të drejtës kushtetuese në Maqedoni dhe të dëgjojmë edhe qëndrimin e tyre sa i përket kësaj çështjeje”, tha ministri Todorov. Ndërkohë nga OJQ ‘Realiteti’ sot kërkuan dorëheqjen e ministri Todorov dhe zëvendëses së tij Lindita Qazimi, pasi sipas organizatës, me vendimin për mësimin e maqedonishtes nga klasa e parë për nxënësit jomaqedonas, nuk kanë përfillur as ligjin për arsimin. ”Kërkojmë nga ministri Todorov që të jep dorëheqje të parevokueshme bashkë me bashkëpunëtorët e tij, më saktë zëvendësministren që pretendon të përfaqësoj interesat e shqiptarëve dhe përgjegjësi i sektorit për arsim fillor në kuadër të ministrisë së arsimit”, theksoi Leonard Kaja – nga OJQ ‘Realiteti’. Organizata ‘Realiteti’ së bashku me Rininë Demokratike Shqiptare, ishin nismëtarët për çuarjen e vendimit në Gjykatën Kushtetuese. Vendimi i Kushtetueses për pikën dy të vendimit të Ministrisë së Arsimit do të publikohet pas 10 ditësh në Fletoren zyrtare. (alsat/albeu)
Shtuar më 15/07/2010, ora 15:44
Tage: arkiv
Shkruani komentin tuaj!
Të fundit nga kjo kategori