"Tafili", Apeli lë në burg 8 ish-zyrtarët
Arkiv
Gjykata e Apelit në Shkodër lë në burg tetë ish-zyrtarët e burgut të Shën Kollit të akuzuar për shpërdorim detyre e dhënie të ndihmës për largimin e të dënuarit nga vendi i vuajtjes së dënimit.

Ish-zyrtarët u arrestuan pas arratisjes nga burgi i Shën Kollit të shtetasit Admir Tafili i cili humbi gjurmët më 2 tetor 2010. Ai u largua nga banesa e tij, ku ndodhej pasi kishte përfituar leje të posaçme ditore nga burgu me shoqërimin e policëve të Shën Kollit.

Apeli i Shkodrës la sot në fuqi vendimin e Shkallës së Parë për 7 punonjësit e policisë së burgut të Shën Kollit që kryen shoqërimin e Admir Tafilit nga burgu në banesë pas dhënies së lejes. Në fuqi u la edhe masa e arrestit e dhënë për mjekun e burgut Fatos Frangu i cili kishte motivuar lejen e Tafilit me faktin se nëna e tij ishte e sëmurë rëndë në banesë.

Masa e sigurisë ndryshoi për shefin e policisë së burgut të Shën Kollit, shtetasin Nazmi Demerxhi i cili ka dalë nga arresti dhe është lënë në masën detyrim paraqitje.

Admir Tafili, i dënuar me 20 vjet burg për plagosjen e ish-shefit të rendit në Malësi të Madhe, është vëllaii Genci Tafilit i dënuar për pjesëmarrje në vrasjen e ish-kolonelit të Shkodrës, Arben Zylyftari. (albeu.com)
Shtuar më 27/10/2010, ora 17:18

Shkruani komentin tuaj!
Të fundit nga kjo kategori