Statusi, Sequi: Atmosferë pozitive në BE
Në përfundim të vitit 2013, Ambasadori i Delegacionit të Bashkimit Evropian në Tiranë, Ettore Sequi përcolli urimet e tij për Presidentin Nishani dhe Shqipërinë për Vitin 2014. Gjatë një takimi me kreun e shtetit, ambasadori Sequi, në fjalën e tij, siguroi Presidentin Nishani se ekziston një atmosferë pozitive midis vendeve të Bashkimit Evropian për marrjen e statusit për Shqipërinë në muajt në vijim, bazuar në meritë.

Ndërsa Presidenti Nishani u ndal në rëndësinë që sjell viti 2014 për Shqipërinë dhe shqiptarët në procesin e integrimit. Kreu i Shtetit theksoi se Shqipëria është një vend evropian, integrimi në familjen evropiane mbetet prioriteti strategjik i vendit dhe shprehu besimin se në periudhën në vijim politika dhe institucionet shqiptare do të vijojnë të punojnë në drejtimin e duhur për të merituar statusin e vendit kandidat përmes arritjes së standardeve të kërkuara, në bashkëpunim të ngushtë me miqtë dhe partnerët tanë evropianë.

"Në këtë kuadër, Presidenti Nishani siguroi Ambasadorin Sequi për rolin pozitiv dhe në mbështetje të reformave të nevojshme që Presidenti i Republikës do të vijojë të luajë për këtë proces, duke theksuar se arritja e standardeve të kërkuara evropiane është baza e suksesit të këtij procesi. Në vijim, Kreu i Shtetit shprehu vlerësimin dhe mirënjohjen për mbështetjen dhe inkurajimin e vazhdueshëm që Ambasadori Sequi ka dhënë për Shqipërinë gjatë ushtrimit të mandatit të tij në vendin tonë." thuhet në deklaratën e shpërndarë nga Presidenca për mediat. /albeu.com/
Shtuar më 30/12/2013, ora 16:36
Shkruani komentin tuaj!
Të fundit nga kjo kategori