S'paguajnë taksat për lojërat e fatit, bllokim të pasurive të paluajtshme
Sa i takon lojërave të fatit, tashmë të gjithë ata që nuk paguajnë taksat e shtetit do të pësojnë bllokim të llogarive dhe pasurive të paluajtshme. Këshilli i Ministrave publikoi një vendim në Fletoren Zyrtare, sipas të cilit subjektet e lojërave të fatit që nuk shlyejnë detyrimet, do përballen me bllokimin e llogarive dhe të pasurive të paluajtshme që zotërojnë.

Nëse subjektit i është dërguar dokumenti: “Njoftim për pagimin e detyrimit”, por ky detyrim nuk është paguar ende, atëherë këto detyrime janë subjekt i masave shtrënguese në përputhje me legjislacionin përkatës.

“Ky dokument përfaqëson barrën siguruese dhe hipotekore në favor të shtetit shqiptar, përfaqësuar nga Njësia e Mbikëqyrjes së Lojërave të Fatit, mbi të gjithë pasurinë dhe të drejtat pasurore, të cilat i përkasin këtij subjekti, lidhur me shumën e detyrimeve të papaguara në afatin e kërkuar prej tij (detyrimi 0.5 %, gjoba dhe kamatëvonesë). Vendosja e kësaj barre hipotekore/siguruese, synon të garantojë pagimin e tyre në rast të mospagimit vullnetar”, thuhet në njoftimin që do u drejtohet subjekteve. /albeu.com/
Shtuar më 28/10/2014, ora 10:59

Shkruani komentin tuaj!
Të fundit nga kjo kategori