Ish-zëvendëskryeministri Bashkim Kopliku është përcjellë sot në banesën e fundit pasi humbi betejën me Covid-19.

Homazhet në nder të Koplikut, i cili njihet nga të gjithë qytetarët durrsakë për kontributin e tij të çmuar, u mbajt në sheshin ‘Liria’ në Bashkinë e Durrësit.

Familjarë, miq, qytetarë dhe anëtarë të Partisë Demokratike, i dhanë sot lamtumirën e fundit ish-ministrit të Brendshëm.

Bashkëshortja e tij, Luljeta Kopliku, e cila qëndron në shtëpinë e saj pasi ka rezultuar pozitive ndaj Covid-19, është shprehur se nuk e di se çfarë ka ndodhur në të vërtetë. Ajo ka thënë për “Neës24” se Bashkimi ishte shtruar në spitalin e Durrësit, ndërkohë që fëmijët kishin insistuar që ai të nisej për kurim në Breshia të Italisë.

Pasi kishin porositur një charter, Luljeta Kopliku rrëfeu se mjeti i fluturimit ishte vonuar për të mbërritur në Rinas nga Turqia, ndërsa shton se dhe ambulanca kishte ardhur me vonesë në spitalin e Durrësit.

Sipas zonjës Kopliku, gjendja e 77-vjeçarit ishte e qëndrueshme, por për shkak se Covid i kishte prekur mushkëritë, kishte nevojë për oksigjen.

Gjithashtu ajo pohoi se ambulanca që e kishte transportuar drejt Rinasit (në orën 16:00) nuk kishte pasur mjaftueshëm oksigjen. Luljeta ka zbuluar edhe bisedën e fundit me bashkëshortin e saj, i cili ishte ankuar duke thënë: “Nuk ngopem dot me oksigjen”.

Ndërkohë që vetëm pas 30 minutash nisje për në Rinas, ajo ishte njoftuar nga personeli i avionit se Bashkim Kopliku kishte ndërruar jetë, ende pa hipur në bordin e mjetit fluturues.