Kryetarja e Inspektoratit të Lartë të Deklarimit të Pasurive, Zana Xhuka, ka reaguar dje pas kallëzimit penal në Prokurori nga stafi i këtij institucioni.

Kryeinspektorja e ILDKP-së ka bërë me dije se është dhunuar në punë fizikisht dhe verbalisht nga inspektori i ILKDP-së, Shkëlqim Ganaj, ndaj të cilit është bërë dhe kallëzim penal në Prokurorinë e Tiranës, shkruan Panorama ne numrin e saj te sotem.


Zana Xhuka ka kërkuar mbrojtje nga Policia e Qarkut të Tiranës dhe nga Policia e Shtetit për të dhe familjen e saj, pasi është kërcënuar për shkak të ushtrimit të detyrës.

“Njoftojmë se inspektori Shkëlqim Ganaj pezullohet nga detyra për dhunë fizike dhe verbale ndaj një titullari të lartë të shtetit shqiptar në detyrë dhe do të kallëzohet penalisht. Për këtë arsye i kam kërkuar Policisë së Qarkut Tiranë dhe Drejtorisë së Përgjithshme të Policisë së Shtetit mbrojtje të veçantë të personit tim dhe familjes sime”, deklaron Xhuka.

Shkëlqim Ganaj ka qenë kandidati i dytë i propozuar nga Presidenti i Republikës, Bujar Nishani, për postin e kryeinspektorit të ILDKP-së.