Shqipëria e Serbia, pa pasaporta, edhe Kosova në Samitin e Sofjes për tregun rajonal
Qytetarët e Shqipërisë dhe Serbisë do të lëvizin tashmë vetëm me karta identiteti.

Marrëveshja është nënshkruar online këtë të hënë, në takimin virtuale mes Kryeministrit Edi Rama dhe Presidentit të Serbisë Aleksandër Vuçiç, nën drejtimin e kryeministrit të Maqedonisë së Veriut Zoran Zaev, në kuadër të “Mini-Schengenit”.

Por veç lëvizjes së lirë, tre liderët kanë nënshkruar një memorandum bashkëpunimi për luftën ndaj COVID-19, ku është dakordësuara që të tre shtetet do të mundësojnë lëvizjen e qytetarëve pa testin PCR, tamponin. Në fjalën e tij, Edi Rama i vlerësoi këto dy marrëveshje.

EDI RAMA:

"Është një hap shumë pozitivi që tashmë Shqipëria ka lëvizje të lirë me të gjithë vendet, përfshirë dhe Serbinë, me të cilën nënshkruam marrëveshjen e lëvizjes së lirë për qytetarët tanë vetëm përmes kartës së identitetit. Gjithashtu është një hap shumë pozitiv dhe memorandum i nënshkruar mes nesh për të shkëmbyer informacion, eksperiencë dhe gjithçka tjetër në luftën kundër Covid-19.



Por Rama është ndalur dhe tek bashkimi i Kosovës në këtë tryezë.

"Jam shumë i lumtur që nesër me Samitin e Sofjes, nis një erë e rë e bashkëpunimit tonë të ngushtë, Kosova bashkohet në tryezë dhe uroj që dhe dy vendet e tjera të këtij komuniteti të Ballkanit Perëndimor, do të na bashkohen përfundimisht, në mënyrë që të ecim bashkë drejt një të ardhme më të mirë.

Ndërkaq lajmi për pjesëmarrjen e Kryeministrit Hoti në Samitin e Sofjes është konfirmuar nga vet Qeveria e Kosovës, e cila me anë të një njoftimi zyrtar ka konfirmuar se Hoti do të jetë pjesë e këtij samiti i cili si temë ka Tregun e Përbashkët Rajonal – Katalizator drejt Tregut të Bashkimit Evropian. “Për shkak të pandemisë me Covid 19, takimi do të jetë virtual dhe Republika e Kosovës do të marrë pjesë mbi bazën e të barabartëve.” – thuhet në njoftimin e qeverisë së Kosovës.





Shtuar më 09/11/2020, ora 17:21

Shkruani komentin tuaj!
Të fundit nga kjo kategori