Shokuese, në Durrës humbën 400 kg kokainë pasi u kapën nga policia?
Ngarkesa e drogës së kapur para disa ditësh në Durrës nuk ishte 613 kilogram, por 1 ton e ndarë në dy konteinerë.

Ky është versioni i ngjarjes i hedhur nga gazeta "Shekulli" sot duke iu referuar burimeve nga prokuroria.

Pjesë nga shkrimi i gazetës
Dyshimet e para flasin se bëhet fjalë për një sasi prej 1 tonësh që është nisur me ngarkesat e bananeve, por policia jonë duket se ka humbur betejën me shifrën prej afër 400 kg të kokainës që ka dyshime se mund të kenë qenë në ndonjë kontejner tjetër.

Dyshimet e para flasin se ajo sasi mund të jetë nisur drejt Malit të Zi, një destinacion thuajse i përhershëm i kokainës që vinte në vendin tonë.

Burimet e prokurorisë bëjnë me dije se po presin një sërë përgjigjesh nga homologët e tyre në Ekuador, Kolumbi dhe Argjentinë për të mësuar të vërtetat e ngarkesave që janë nisur drej vendit tonë kohët e fundit”shkruan gazeta.

613 kilogramë kokainë u gjetën në dyshemenë e dyfishtë të kontejnerit të ngarkuar me banane që ishte porositur nga Arbri Garden.

Pronari i kompanisë është në arrati, ndërsa sipas të dhënave nga trafiku i anijeve ai kishte bërë edhe 97 rrugë të tjera nga vendet e Amerikës Latine drejt Shqipërisë.

Madje njëra nga porositë ishte bllokuar më parë në Ekuador, por kjo nuk e pengoi Arbër Çekajn të vazhdonte i qetë me importin e ‘frutave’”.
Shtuar më 08/03/2018, ora 18:02

Shkruani komentin tuaj!
Të fundit nga kjo kategori