Teksa lufta në Ukrainë është në muajin e dytë të zhvillimit të saj, duket se ukrainasit janë të bindur për të mos i lëshuar rajonet në lindje të vendit.
Ka qenë Presidenti i Ukrainës, Volodymyr Zelensky, i cili ka dhënë një intervistë për CNN, ku ka folur për ecurinë e bisedimeve të paqes dhe rrugës që do të ndjekin për të ardhmen.
Zelensky ka thënë se nuk janë të gatshëm të heqin dorë nga territoret në pjesën Lindore të vendit për t’i dhënë fund luftës me Rusinë, duke shprehur gatishmërinë se trupat e tyre mund të përballojnë ushtrinë e Moskës.
Zelensky tha në një intervistë ekskluzive të premten me Jake Tapper të CNN nga zyra e presidentit në Kiev se vendi i tij nuk ka asnjë garanci se Rusia nuk do të përpiqet përsëri të pushtojë Kievin nëse është në gjendje të pushtojë Donbasin.
“Kjo është arsyeja pse është shumë e rëndësishme për ne që të mos i lejojmë ata, të qëndrojnë në këmbë, sepse kjo betejë … mund të ndikojë në rrjedhën e të gjithë luftës,” tha Zelensky.
“Sepse nuk i besoj ushtrisë ruse dhe udhëheqjes ruse,” vazhdoi ai. “Kjo është arsyeja pse ne e kuptojmë se fakti që ne i luftuam ata dhe ata u larguan, dhe ata po iknin nga Kievi — nga veriu, nga Chernihiv dhe nga ai drejtim — nuk do të thotë nëse ata janë në gjendje të kapin Donbas, ata nuk do të shkojnë më tej drejt Kievit”.
Kujtojmë se kanë kaluar më shumë se shtatë javë nga sulmi i presidentit rus Vladimir Putin ndaj Ukrainës. Ushtria e Ukrainës ka parë suksese duke i rezistuar ofensivës ruse që kanë ardhur si befasi për inteligjencën amerikane, pasi Kremlini besonte në një fitore të shpejtë dhe vendimtare në shtetin fqinj.
