UPDATE - Pas shkarkimit të kreut të Shërbimit Informativ Kombëtar, Bahri Shaqiri, nga ana e Presidentit Bujar Nishani, me kërkesë të Kryeministrit Berisha, kanë filluar të vijnë edhe reagimet e para, njofton Portali Albeu.

Bahri Shaqiri ishte në krye të Shërbimit Informativ shtetëror prej shumë vitesh dhe i kishte rezistuar një përpjekje të mëparshme të kryeministrit për zëvendësimin e tij, falë një ndërhyrjeje energjike të ambasadës amerikane por edhe të zyrave të NATO-s.

Një burim i nivelit të lartë në ambasadën amerikane i tha Zërit të Amerikës se njoftimin për lirimin nga detyra të Shaqirit e kishin mësuar nga lajmet. “Koha dhe arsyeja përbëjnë pikëpyetje”, shtoi më tej burimi. Si duket, këtë herë ambasada amerikane nuk ishte e njoftuar për këtë vendim të papritur për momentin.

Nga partitë politike, e para ka reaguar Aleanca KuqeZi e cila këtë shkarkim e quan si hallkë të fundit të "pushtimit të institucioneve".

Edhe Fryma e Re Demokratike e ka cilësuar dekretimin e kreut të ri të SHISH-it nga Presidenti i Republikës Bujar Nishani si një lëvizje e kryeministrit Berisha për të vënë nën kontrollin e tij të gjitha institucionet.

Në vend të zotit Shaqiri, është emëruar Visho Lika, aktualisht zëvendësministër i Inovacionit dhe Teknologjisë. Zoti Lika ka mbaruar fakultetin e Shkencave të Natyrës në Tiranë. Në fillim të viteve ’90, ai ka shërbyer si drejtor i kundërzbulimit të huaj në shërbimin sekret të asaj kohe.