Sherri në Facebook/ “Si më përplasën me makinë e më qëlluan me automatik”
Nga Spitali Ushtarak ku ndodhet i shtruar, 23-vjeçari Amarildo Koçeku që u qëlluam me automatik dhe më pas u godit me makinë më 9 tetor, rrëfen se nuk e meriton të hyjë në burg për kanosje dhe se sherri ndërmjet 4 personave të ndarë në dy grupe, kishte të bënte vetëm me disa fjalë banale të shkëmbyera në Fb.

Koçeku thotë për Gazetë Shqiptare se “atë ditë kam qenë së bashku me dajën tim të vogël kur Shpëtimi na ka dalë para me një makinë. Na ka ofenduar dhe kërcënuar. Me të nuk kam pasur asnjë lloj konflikti. Madje edhe si fytyrë nuk e njihja mirë, sepse nuk kisha asnjë lloj lidhjeje me të."

Sa për kërcënimin me armë, ai mohon kategorikisht: "Unë nuk kam pasur asnjë lloj arme me vete. Unë nuk kam armë."

Për shkakun e debatit, ai tregon se konflikti ka nisur një muaj më parë me nipin e Shpëtimit, i cili, së bashku me tre shokë të tij "më kanë qëlluar me kaçavidë 3-4 herë në pjesën e shpinës.

Atëherë kam marrë dëmtime të lehta. Nuk bëra asnjë denoncim. Ai rast u mbyll mes nesh. Edhe policia ishte në dijeni, sepse u thirr edhe polici i zonës. Konflikti nisi vetëm nga disa fjalë banale në “Facebook”, përfundoi ai. Rreth orës 00:35, në rrugën "Bedri Karapici", Erlando Markola dhe Amarildo Koçeku i kanë bërë pritë shtetasit Shpëtim T dhe ku Amarildo Koçeku dyshohet t'i ketë drejtuar një pistoletë. Në atë moment, Shpëtim T. me makinën e tij tip "Volkswagen", e ka përplasur Amarildo Koçekun.

Nga situata e krijuar, ka ndërhyrë K.T.,nipi i Shpëtimit, që ka marrë në shtëpi një automatik dhe dyshohet të ketë qëlluar në drejtim të Erland Markolës dhe Amarildo Koçekut, duke e plagosur këtë dytin. Tashmë, Koçeku ndodhet në S.Q.U. jashtë rrezikut për jetën.

Mëngjesin e datës 9.10.2016, rretho orës 8:00, është paraqitur dhe ka bërë kallëzim në Komisariatin e Policisë Nr.6, një 21-vjeçar me iniciale L. M., banues në Tiranë. Ai rrëfeu se më datë 8.10.2016, rreth orës 23:00, në rrugën "Bedri Karapici", dy persona kanë dalë nga një mjet tip "Mercedes Benz", duke i drejtuar një armë zjarri tip pistoletë. Nga përshkrimi i personave dhe paraqitja për njohje me anë të fotos, dyshohet se një nga dy autorët të jetë Erland Markola.

Në cilësinë e provës materiale në vendin e ngjarjes janë sekuestruar: Katër gëzhoja arme zjarri model 56 dhe një"Volkswagen" në pronësi të Shpëtim T.

Po punohet për kapjen e dy shtetasve të shpallur në kërkim si dhe gjetjen e armëve të dyshuara të përdoruara në këtë ngjarje.

Materialet procedurale iu kaluan Prokurorisë Pranë Gjykatës së Shkallës së Parë Tiranë, për veprat penale "Kanosja" dhe "Prodhimi dhe mbajtja pa leje e armëve luftarake dhe e municionit", parashikuar nga Nenet 84-25 dhe 278 të Kodit Penal në ngarkim të shtetasve Erland Markola dhe Amarildo Koçeku.

Për veprat penale "Tentativë vrasje në bashkëpunim" dhe "Prodhimi dhe mbajtja pa leje e armëve luftarake dhe e municionit", parashikuar nga Nenet 76-22-25 dhe 278 të Kodit Penal në ngarkim të shtetasve Shpëtim T. dhe K. T./Albeu.com/
Shtuar më 18/10/2016, ora 08:15

Shkruani komentin tuaj!
Të fundit nga kjo kategori