SHËNIM/ Farsa me "super operacionin" e Forcave Speciale në Elbasan (VIDEO)
Pëlqej
Nga Albeu.com
Gjatë paradites dhe mesdites së sotme, burime zyrtare nga policia si edhe media kanë njoftuar publikun për një "mega operacion" të policisë në Elbasan pasi shteti i sfidua publikisht disa ditë më parë teksa personazhe të inkriminuar godisnin me makinë të blinduar automjetin e zv.drejtorit të policisë së qytetit.

Pati një pritshmëri të madhe nga kjo prezencë e lartë e policisë në qytet.

Albeu.com raportoi gjerësisht mbi këtë operacion me shpresën se më në fund, po vinte era shtet në Elbasan!

Tashmë që ky operacion i cilësuar si "super" ka përfunduar, të gjithë kërkojnë rezultatet, por për hir të se vërtetës, nuk është se ka ndonjë gjë për t'u shënuar.

Është lajmëruar për disa të ndaluar, 27 të tillë, por nuk ka asnjë të kërkuar që është arrestuar. Madje, nuk raportohet të ketë asnjë të ndaluar apo arrestuar nga personazhet që sfiduan shtetin hapur disa ditë më parë në këtë qytet.

Ndoshta me kalimin e orëve mund të kemi, por deri më tani, asnjë.

Është lajmëruar për sekuestrime pronash dhe makinash luksoze, por nuk ka asnjë detaj tjetër.

Duke parë dhe pamjet e publikuar nga vetë policia të këtij aksioni, më shumë se një operacion për arrestimin e personazheve të krimit, duket se kemi të bëjmë me thjesht një tregim force nga ana e shtetit në një qytet që prej muajsh të tëra ndodhet nën darën e krimit.

Shteti, i prekur në sedër nga sfida publike që bandat i bënë disa ditë më parë, bëri një tregim force në terren me forca speciale dhe policë rrugorë.

Por, kaq!

Nuk ka arrestim banditësh, të cilët ndoshta sot kanë ikur nga qyteti duke ngrënë ndonjë drekë në zona të afërta deri në qetësimin e situatës dhe rikthimin në mbrëmje për të vijuar aktivitetin e pezulluar për disa orë.

I gjithë qyteti i njeh grupet kriminale që e kanë bërë zap zonën, por me sa duket as prokuroria dhe as policia nuk kanë ende prova për t'i çuar ata pas hekurave, ndërsa duket se politika fitoi edhe kësaj radhe duke penguar vendosjen e rendit në këtë qytet.

Njoftimi zyrtar për operacionin në fjalë
Prej orëve të para të ditës së sotme strukturat e Policisë së Drejtorisë Vendore të Policisë Elbasan, mbështetur nga Struktura të Posacme, Forcat Speciale Renea dhe ato të FNSh-së, kanë ndërmarrë një operacion të gjerë policor në qytetin e Elbasanit dhe rrethinat e tij.

Ky operacion konsiston në kontrollin, identifikimin, kapjen dhe arrestimin e personave në kërkim, të atyre që qarkullojnë me armë zjarri, autorëve të ngjarjeve të rënda kriminale, pjestarë të grupeve kriminale, duke përfshirë edhe autorët e ngjarjes së ndodhur më datë 20.09.2017 në qytetin e Elbasanit.

Gjithashtu ky operacion zhvillohet edhe në kuadër të Plan Operacionit "Vjeshtë 2017", për identifikimin, konstatimin dhe sekuestrimin e aseteve, automjeteve dhe pasurive të vendosura në mënyrë të paligjshme nga veprimtaritë kriminale të grupeve apo organizatave kriminale.

Nga veprimet e deritanishme janë identifikuar dhe bllokuar disa asete, pasuri, ambiente dhe automjete të ndryshme në pronësi, posedim apo përdorim të subjekteve me aktivitet kriminal.
Me qëllim hetimin e plotë ligjor dhe vënien përpara përgjegjësise ligjore të autorëve po bashkëpunohet me Prokurorinë e Krimeve të Rënda Tiranë dhe agjencitë e tjera ligjzbatuese.

Si rezultat i operacionit të sotëm janë bllokuar disa makina luksoze.

Është kapur një person në kërkim për vjedhje me armë.
Janë kontrolluar ambiente, automjete e persona të dyshuar.
Janë shoqëruar në ambientet e Policisë 27 persona për verifikim, kryesisht persona me precedent penal në fusha të ndryshme.

Policia e Shtetit falënderon të gjithe qytetarët e Elbasanit të cilët kanë përcjellë informacionet dhe shqetesimet e tyre dhe i siguron ata se Policia i ka trajtuar dhe po vazhdon ti trajtojë me shumë seriozitet e përkushtim si dhe po vijon punën për të siguruar rendin dhe qetësinë qytetarëve të Elbasanit dhe të gjithë komunitetit në çdo cep të territorit të vendit.
Shtuar më 21/09/2017, ora 17:01
Shkruani komentin tuaj!
Të fundit nga kjo kategori