SHËNIM/ Dekriminalizimi, që të mos na mbetet vetëm ligji
Nga Albeu.com
Maxhoranca dhe opozita votuan sot me konsensus ligjin për dekriminalizimin duke marrë menjëherë përgëzime nga ndërkombëtarët. Madje, eurodeputetët Knut Fleckenstein dhe Eduard Kukan i kanë dërguar një letër të përbashkët Kryeministrit Edi Rama dhe kreut të PD-së, Lulzim Basha duke theksuar se ky është një hap i rendësishëm që hedh vendi në rrugën për intengrimin për në Bashkimin Europian.

“Sot duam t’ju përgëzojmë ju për miratimin e të ashtuquajturit ligji për dekriminalizimin, votim i cili është rezultat i marrëveshjes së arritur në dhjetor të vitit të shkuar”, - shkruajnë ata.

Por, pas lëvdatave, eurodeputetët kalojnë në pikën ku çalon më shumë Shqipëria. Ata i kujtojnë të dy liderëve që pas votimit të mundësojnë implementimin e ligjit.

“Të duam të besojmë se mbështetja politike e partive tuaja do të mundësojë implementimin e shpejtë të këtij ligji”, - vijon letra.
Shqetësimi i ndërkombëtarëve është me vend. Kjo marrëveshje u arrit mes një klime të tensionuar mes socialistëve dhe demokratëve, të cilët u gjenden përballë presionit të ambsadorëve dhe përfaqësuesve nga BE që të bëjnë pastrimin e radhëve të tyre nga personat e inkriminuar.

Gjithashtu, PS ishte nën presion edhe për shkak të një serë skandalesh të disa deputetëve dhe drejtuesve të saj duke u detyruar kështu t’i japë konsensusin propozimit të Partisë Demokratike duke shënuar njëkohësisht edhe fitoren e parë politike të Bashës si lider i PD-së.

Duke ditur pikërisht këtë fakt, por edhe duke njohur të shkuarën e afërt në raport me sipërmarrje të tilla shqetësimi i ndërkombëtarëve duket legjitim.

Miratimi i ligjit ishte një pjesë e konsensusit, sfida e partive është që t’a zbatojnë atë për të treguar se nuk kishim të bënim me një aksident./Albeu.com/
Shtuar më 17/12/2015, ora 22:05

Shkruani komentin tuaj!
Të fundit nga kjo kategori