Shalsi: Vasili fsheh listën e barnave spitalore
Eduart Shalsi
Deputeti socialist Eduard Shalsi deklaroi sot se një deputet i PS i ka kërkuar Ministrit të Shëndetësisë për ti vënë në dispozicion listën e barnave spitalore, thënë më thjesht ilaçet që duhet të gjenden në spitale.

“Ministri që këtë listë duhej ta kishte publike nuk ka kthyer ende përgjigje se cila është kjo listë. E mban të fshehur. Përse? Çfarë e tremb? Përse ka frikë ta afishojë dhe ta bëjë publike? Ishte një listë e cila u desh muaj të përgatitej. Por ende nuk kemi kuptuar se përse mori kaq kohë për tu hartuar? Ende nuk është dhënë një arsye se cilat janë kriteret që u përdorën për të hartuar listën e barnave spitalore”, theksoi Shalsi. Sipas tij, u hartua nga brenda Ministrisë apo njerëz jashtë saj dhe pranë Ministrit.

“Një tjetër fakt. Qendra Spitalore Universitare Tirana dhe disa spitale të tjera u urdhëruan të blinin në mënyrë të drejtpërdrejt ilaçet e një kompanie, ilaçe të cilat nuk u futën në listën e rimbursimit. Cila është kjo kompani? Çfarë e bën të veçantë? Çfarë është kjo liste ilaçesh të vendosura me emra tregtare dhe me preference të Petrit Vasilit? Përse lista e ilaçeve të QSUT nuk u firmos nga drejtori i QSUT dhe ish përgjegjesja e farmacisë, e cila pak me vonë u zëvendësua?”, theksoi Shalsi.

Ai këmbënguli se gjatë vitit 2010 ka dalë në pah një kompani që tregton ilaçe, kompani e cila ka njohur një rritje të paparë biznezi brenda një viti. “A ka dijeni Petrit Vasili për këtë kompani që ka fituar një numër të jashtëzakonshëm tenderash në QSUT dhe në të gjithë rrjetin spitalor?

Dhe çfarë lidhje ka midis përgjegjësit të ri të farmacisë spitalore në QSUT dhe kësaj firme? Shumë shqiptarë po vuajnë nga sistemi i korruptuar shëndetësor dhe në ditët në vazhdim ne do të sjellim në vëmendje plagët por do të bëjmë me dije edhe për shkaktarët e kësaj gjendjeje të mjerueshme”, insistoi Shalsi. (albeu.com)
Shtuar më 31/10/2010, ora 13:11

Shkruani komentin tuaj!
Të fundit nga kjo kategori