Serbia paralajmeron rezistence per krijimin e Mitrovices se veriut
Albeu.com
Ekipi përgatitor për komunën veriore të Mitrovicës me gjasë do të hasë në rezistencë të organizuar të Beogradit qysh në start të punës së tij. Vetëm një ditë pas emërimit të 14 anëtarëve të këtij ekipi nga përfaqësuesi civil ...... ndërkombëtar, Pieter Feith, sekretari shtetëror në Ministrinë Serbe për Kosovën, Oliver Ivanoviq, ka thënë se ky ekip nuk do të ketë sukses dhe e ka quajtur të pavlefshëm atë. Duke folur në emër të komunitetit shumicë të veriut, Ivanoviq ka thënë se serbët nuk janë të interesuar për komunë, sepse e kanë komunën e tyre, shkruan sot në një tekst më të gjatë Koha Ditore.
“Së pari komuna në veri de fakto është krijuar në vitin 1999 edhe de jure është krijuar në vitin 2002 me marrëveshjen Steiner – Çoviq. Ajo marrëveshje në mes të UNMIK-ut dhe Qeverisë së Serbisë e asaj kohe është ende në fuqi dhe askush nuk mund ta anulojë atë”, ka thënë për “Kohën Ditore” Ivanoviq, duke iu përgjigjur vendimit të Feithit për emërimin e anëtarëve të ekipit përgatitor.

Ekipi i emëruar nga përfaqësuesi civil ndërkombëtar, Pieter Feith, ka mandat teknik për të përgatitur të gjitha resurset, pasuritë dhe strukturat administrative që nevojiten për krijimin dhe funksionimin e ardhshëm të komunës së re të Mitrovicës veriore. Ekipit do t’i bashkohet edhe nga një përfaqësues i Ministrisë së Administrimit të Pushtetit Lokal, një përfaqësues nga komuna jugore dhe një përfaqësues nga Zyra Civile Ndërkombëtare, saktëson komunikata.

Por Oliver Ivanoviq thotë se serbët në atë pjesë e njohin vetëm autoritetin e UNMIK-ut si mbikëqyrës të funksionimit komunës së veriut.
“Ne e kemi UNMIK-u si mbikëqyrës dhe nuk na pengon ajo aspak dhe ne i kemi njerëzit e zgjedhur”, ka thënë ai, duke ia bërë me dije Qeverisë së Kosovës se serbët “nuk kanë nevojë për një komunë të krijuar nga Prishtina.
“Ne nuk kemi nevojë aspak për komunë të re të krijuar nga Qeveria e Kosovës, aspak, sepse të gjitha shërbimet që kemi nevojë i ofron komuna aktuale së bashku me UNMIK-un”, ka thënë sekretari shtetëror në Ministrinë Serbe për Kosovën, Oliver Ivanoviq.
Shtuar më 07/02/2010, ora 17:18
Tage: arkiv
Shkruani komentin tuaj!
Të fundit nga kjo kategori