Sejdiu: Kosovarët janë të gatshëm të ecin në dy proceset paralelisht, zgje
Albeu.com
Statuskuoja në Kosovës është e paqëndrueshme dhe se statusi i saj duhet të zgjidhet sa më shpejt që të jetë e mundur, kanë thënë sot Presidenti i Kosovës, Fatmir Sejdiu dhe zëvendësshefi i UNMIK ut, Stiven Shuk.Presidenti Sejdiu tha se pret që treshja ndërmjetësuese në negociatat për statusin t'i përmbahet axhendës dhe të përmbyllë procesin negociues më 10 dhjetor. Ai tha se pala kosovare nuk do të pranojë asnjë formulë apo zgjidhje tjetër përveç asaj të proklamuar deri më tash për pavarësinë e Kosovës duke pranuar si zgjidhje dokumentin e presidentit Ahtisari. "Është një prezantim i sërishëm i asaj që është prezantuar edhe në takimet e përparshme. Por nuk do të ketë asnjë marrëveshje që insistohet në formula tjera veç pavarësisë nuk do ta pranojmë", nënvizoi Presidenti Sejdiu. Shtyrja eventuale e statusit në disa raste ndërlidhet me zgjedhjet e lira që pritet të mbahen sivjet në Kosovë. Mirëpo, Presidenti Sejdiu tha se në rast që dikush nga bashkësia ndërkombëtare do të përpiqej ta arsyetonte ndonjë shtyrje të re me zgjedhjet, Kosova do të jetë e gatshme që nëse është e nevojshme edhe t'i shtyjë zgjedhjet pas statusit. Sidoqoftë, Sejdiu tha se deri më tash Kosova po tregon se është e gatshme t'i zhvillojë dy procese paralele, atë të statusit dhe zgjedhjeve. "Nganjëherë mund të dëgjohen zëra se a janë bërë përgatitjet teknike dhe a janë ato pengesë, a mund të mbahen zgjedhjet apo a mund të shtyhet statusi për shkak të zgjedhjeve, por ju kujtohet formula e cila vlen edhe tani se Kosova është e gatshme për dy proceset. Çështja e statusit nuk mund të shtyhet për variante të tjera, prandaj jemi të gatshëm që të mbajmë një proces të mirë të zgjedhjeve", tha Sejdiu. Në anën tjetër, zëvendësshefi i UNMIK ut, Stiven Shuk tha se deri tash në bazë të gjitha vlerësimeve politike, nuk sheh ndonjë arsye që zgjedhjet të shtyhen. "I shpreha Presidentit mendimin tim se bazuar në zhvillimet e deritashme, mendoj se nuk ka arsye teknike që do të pamundësonin mbajtjen e këtyre zgjedhjeve më 17 nëntor", tha Shuk. Ai pohoi në vazhdim se UNMIK u po e vlerëson lart punën e Ekipit të Unitetit në procesin negociues për pavarësinë e Kosovës. Shuk tha po ashtu se KFOR i dhe UNMIK u janë të gatshme të mbajnë gjendjen nën kontroll në aspektin e sigurisë si tani ashtu edhe në kohën e vendimit të për statusin e saj. Duke u ndërlidhur me raportin e fundi të të Grupit Ndërkombëtar të Krizave dhe paraleleve që vihen lidhur me zgjidhjen e statusit të Kosovës dhe implikimeve në Luginën e Preshevës, Presidenti Sejdiu tha se Beogradi mund të luajë edhe lojëra të ndryshme për të destabilizuar gjendjen e sigurisë dhe i bëri thirrje bashkësisë ndërkombëtare që ta ketë parasysh këtë fakt. "Nuk e lëmë anash mundësinë e ngritjes së tensioneve që Serbia dëshiron t'i bëjë në luginën e Preshevës. Është borxh i faktorit ndërkombëtarë që t'ua bëjë me dije që me ato lojëra nuk mund të merren sepse shkaktohen reagime të tjera që mund të jenë me pasoja të paparashikueshme. Por për ne është me rëndësi stabiliteti dhe të reflektojë për të gjithë qytetarët e Kosovës, por është me rëndësi që edhe shqiptarët në Luginën e Preshevës t'i realizojnë të drejtat e veta", u shpreh Sejdiu.
Shtuar më 18/10/2007, ora 15:12
Tage: arkiv
Shkruani komentin tuaj!
Të fundit nga kjo kategori