Një ngjarje e rëndë ka ndodhur ditën e djeshme në Tiranë.
Burimet bëjnë me dije se avokati i njohur Alban Bengasi ka mbetur i plagosur nga kunati i tij, vëllai i bashkëshortes.
Ngjarja e rëndë ka ndodhur një ditë më parë, pranë stadiumit Dinamo, në rrugën “Emin Duraku”.
Kunati i avokatit, Roland Ruçi e ka goditur me thikë gjatë një konflikti. Autori është arrestuar nga policia pas disa orë ndjekjeje dhe kontrollesh.
Motivi i ngjarjes nuk dihet ende, por gjendja e avokatit është e stabilizuar në spital, pavarësisht goditjeve me thikë që ka marrë nga kunati.
Alban Bengasi ka qenë avokat i dy shtetasve turq që u arrestuan në Tiranë, Ervin Matës, e të tjerë të pandehurve në çështje të bujshme të ndodhura së fundmi.
Njoftimi i policisë
Vihet në pranga 45-vjeçari që tentoi të vriste me thikë kunatin e tij, i cili ndodhet jashtë rrezikut për jetën.
Shërbimet e Komisariatit të Policisë Nr. 2, pas njoftimit të marrë se në rrugën “Emin Duraku” kishte konflikt mes dy shtetasve, ku një prej tyre kishte goditur me thikë shtetasin tjetër, kanë shkuar menjëherë në adresën e dhënë.
Në momentin që shërbimet e Policisë janë afruar në vendin e ngjarjes, shtetasi R. R., 45 vjeç, është larguar me shpejtësi. Në ndjekje të tij janë vënë forca të shumta të Komisariatit të Policisë Nr. 2 dhe pas disa orë ndjekjeje dhe kontrollesh kanë bërë të mundur kapjen e tij.
Në përfundim të veprimeve u bë arrestimi i shtetasit R. R., pasi gjatë një konflikti për motive të dobëta goditi me thikë kunatin e tij shtetasi A. B.
Materialet i kaluan Prokurorisë, për veprime të mëtejshme, për veprat penale “Vrasje me dashje” e mbetur në tentativë, “Dhuna në familje” dhe “Mbajtja pa leje e armëve të ftohta”.
