Rikthehet makthi për Kryetarin e Gjykatës Kushtetuese
“Ishte si të kaloje varrin për së gjalli” do të deklaronte kryetari i Gjykatës Kushtetuese Bashkim Dedja, disa ditë pasi do të kalonte vettingun, por duket se “ferri” akoma s’ka mbaruar për të.

Këtë të enjte Komisioneri Publik ka ankimuar vendimin e Komisionit të Pavarur të Kualifikimit për Bashkim Dedjan, i cili më 13 korrik rikonfirmoi në detyrë kryegjykatësin e Kushtetueses.

Një javë më parë Operacioni Ndërkombëtar i Monitorimit do të sugjeronte apelimin e këtij vendimi, duke ja adresuar si detyrë Komisionerit Publik çuarjen e dosjes së Bashkim Dedjas në Komisionin e Posaçëm të Apelimit, gjë e cila ka ndodhur këtë të enjte.

Kësisoj, Bashkim Dedja i duhet të përballet sërish me vettingun në KPA.

Deklarata e Komisioneri Publik:


Sot, më datë 26.7.2018, Komisioneri Publik, në ushtrim të funksionit të tij kushtetues, depozitoi pranë Komisionit të Pavarur të Kualifikimit ankimin ndaj vendimit nr. 24, datë 13.6.2018, për subjektin e rivlerësimit z. Bashkim Dedja.

Komisioneri Publik, pasi shqyrtoi vendimin e mësipërm të Komisionit të Pavarur të Kualifikimit, si dhe mori në konsideratë rekomandimin e paraqitur nga Operacioni Ndërkombëtar i Monitorimit për të paraqitur ankim, vlerëson se bazuar në provat dhe faktet e administruara nga Komisioni i Pavarur i Kualifikimit, subjekti i rivlerësimit, z. Bashkim Dedja, nuk arrin një nivel të besueshëm në vlerësimin e pasurisë.

Nëpërmjet këtij ankimi, Komisioneri Publik kërkon nga Kolegji i Posaçëm i Apelimit të marrë në shqyrtim çështjen në seancë gjyqësore dhe në përfundim të gjykimit të ndryshojë vendimin nr. 24, datë 13.6.2018, duke vendosur shkarkimin nga detyra të subjektit të rivlerësimit z. Bashkim Dedja, kryetar i Gjykatës Kushtetuese.

Mbështetur në pikën 1, të nenit 16, të rregullores së Institucionit të Komisionerëve Publikë, ankimi është publikuar në faqen zyrtare të këtij institucioni: ëëë.ikp.al
Institucioni i Komisionerëve Publikë është ngritur dhe funksionon në bazë të nenit 179/b dhe aneksit të Kushtetutës së Republikës së Shqipërisë dhe ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”.

Komisionerët Publikë përfaqësojnë interesin publik gjatë procesit të rivlerësimit kalimtar të gjyqtarëve dhe prokurorëve në Republikën e Shqipërisë.


Shtuar më 26/07/2018, ora 17:14

Shkruani komentin tuaj!
Të fundit nga kjo kategori