Refuzohet interpelanca kunder Jankullovskes
Albeu.com
Me 69 vota "Kundër" dhe vetëm 14 "Për" Kuvendi mbrëmë hodhi poshtë interpelancën për punën e ministereshës për Punë të Brendshme, Gordana Jankullovska.Për deputetët e VMRO-DPMNE interpelanca kundër Janklullovskës ishte e panevojshme, e paarsyeshme dhe kërkoi që opozita ta tërhiqte, ndërsa kolegët e tyre të opozitës vlerësonin se me punën e saj ministresha kontribuon që Maqedonia të bëhet shtet policior dhe se drejtpërdrejtë është përgjegjëse për incidentin në Kuvend.
Ndërsa dje në atmosferë të tensionuar dhe fjalori fyes u zhvilluar në Parlament për interpelancën e ministres së Brendshme Gordana Jankullovska, e iniciuar nga LSDM-ja dhe PRSD-ja. Arsyeja kryesore për ngritjen e interpelancës janë ngjarjet e 1 korrikut në parlament. ‘Periudha juaj në krye të MPB-së do të mbahet mend si periudhë e shtetit policor në Maqedoni’, -theksoi një nga iniciuesit e interpelancës Jani Makraduli. Nga ana tjetër, ministrja Jankullovska i quajti manipulime akuzat e LSDM-së, për sa i përket incidentit të 1 korrikut në parlament.
“Ju do të jeni policia e parë që ka ndërhyrë në Parlament me një grup të armatosur. Turp për shkollimin tuaj në Britani, djepin e demokracisë parlamentare. Sot kemi ministër i cili sillet si gjykatës, prokuror, gjykatës dhe xhelat. Sot kemi udhëheqës në polici ku mbizotëron amatorizmi dhe arroganca. Drejtorët janë nga radhët e njerëzve më të pasur. Drejtori i Sigurisë Publike ka orë që kushton sa rroga vjetore e 10 policëve. Drejtësia ndahet në rrugë dhe diskoteka. Sot më lehtë grabitet bankë, se sa të merret kredi.”, akuzoi Jani Makraduli, deputet i LSDM-së
"Sipas asnjë ligji në Maqedoni, deputetët nuk kanë autorizim të legjitimojnë qytetarë, e as ata që kanë kamera dhe xhirojnë. Deputetë nuk kanë autorizim që të sulmojnë fizikisht dhe të lajnë hesape me dikë, edhe kur nuk e dinë se me kë kanë të bëjnë. Certifikata e sigurimit paraqet dokument i cili shërben për qasje tek informacionet e klasifikuara dhe asgjë më shumë nga kjo", u përgjigj Gordana Jankullovska, ministre e Brendshme.
Deputetja Vesna Bendevska duke reaguar ndaj fjalorit fyes të ministres Jankullovska, pyeti për largimin e letrave me karakter fashist nga faqja e Internetit e MPB-së, ndërsa kryetarin e parlamentit e quajti ‘ushtar të vogël dhe të parëndësishëm partiak’. Ndaj kësaj reagoi koordinatorja e VMRO DPMNE-së duke e quajtur turp, fjalorin e Bendevskës. Për shkak të ndërhyrjeve të tilla Kryetari i Parlamentit u detyrua disa herë të bënte thirrje për kujdes gjatë përdorimit të gjuhës, për të ruajtur dinjitetin e institucionit.
"Këtu në kolltukun më të lartë ulet një ushtar i parëndësishëm partiak, kryetari i parlamentit i cili duhet të reagoj..... Keni shkruar letra, t’ju pyes kush ju tërhoqi veshin që t’i hiqni nga faqja e internetit ato letra fashiste, në të cilat përkufizoni deputetët nga opozita si të dhunshëm, vandal etj", pyeti Vesna Bendevska, deputete e LSDM.
"Është e palejueshme për një deputet të përdorë cilësime të tilla. Edhe më turp, është nënçmimi i institucionit të parlamentit, me atë që radhiten cilësime për ministren e brendshme, ofendime të pahijshme për kryetarin e parlamentit", reagoi Sillvana Boneva, koordinatore e VMRO DPMNE-së.
"Ju tani edhe njëherë u vutë në shërbim të pushtetit e jo të parlamentit, mbrojeni, ne edhe me procedurale edhe pa procedurale do të luftojmë për demokracinë në parlament", replikoi Cvetanka Ivanova, koordinatore e LSDM-së.
Deputetët shqiptar ishin vetëm spektatorë në këtë debat të ashpër që po zhvillohet mes dy partive më të mëdha maqedonase. Interpelanca për ministren Jankullovska sipas rregullores për punë të parlamentit duhet të përfundojë deri në mesnatë kur deputet duhet të votojnë pro ose kundër interpelancës. (alsat-m)
Shtuar më 31/07/2010, ora 10:16
Tage: arkiv
Shkruani komentin tuaj!
Të fundit nga kjo kategori