Nuk është hera e parë që eksponentë të dorës së dytë të së djathtës europiane bëhen pjesë e fushatave denigruese ndaj opozitës shqiptare, krah për krah me Sali Berishën. Kështu është shprehur kreu i Partisë Socialiste, Edi Rama, lidhur me përmbajtjen e njoftimit të Kryeministrisë pas takimit të Kryeministrit Berisha me Kryetarin e grupit të partive popullore europiane në Këshillin e Europës, Luka Volonte.


Në një deklaratë për mediat Rama shprehet se "sado të shpifë e shajë opozitën kryetari i Partisë Demokratike dhe çfarëdo isoje t`i mbajë atij ndonjë i djathtë europian, Partia Socialiste ka bërë në këtë vit politik për integrimin europian e për statusin e kandidatit për Shqipërinë, aq sa asnjë opozitë s`ka bërë ndonjëherë më pare".


"Përrallën e bllokimit të statusit nga opozita meqë socialistët kanë deklaruar se nuk votojnë në datën 6 gusht, zotërinjtë Berisha dhe Volonte mund t`ia tregojnë njëri-tjetrit apo atyre që u besojnë verbërisht, po asnjë shqiptari që shikon e që dëgjon me sytë e me veshët e tij", thuhet më tej në deklaratë.


Kryesocialisti Edi Rama e siguron opinionin publik dhe miqtë e partnerët ndërkombëtarë se Partia Socialiste mbetet e palëkundur në qëndrimin e saj: Grupi parlamentar i opozitës do ta votojë pro kufizimin kushtetues të imunitetit, vetëm pasi të jenë diskutuar edhe ndryshimet e tjera kushtetuese të propozuara prej tij.


Kryesocilaisti gjithashtu i bën thirrje kryeministrit të heqë dorë nga politika e shpifjeve e sharjeve ndaj opozitës dhe t`i hapë rrugë pa humbur kohë debatit për pjesën ende të padiskutuar të ndryshimeve kushtetuese që ka propozuar opozita. /albeu.com/