Rasti i Sopotit, serish shtyhet seanca gjyqesore ndaj Zenel Klaiqit
Albeu.com
Në Gjykatën e Apelit është shtyrë për të katërtën herë seanca gjyqësore ndaj të burgosurit të fundit për rastin e Sopotit, Zenel Klaiqit dhe gjashtë bashkëfshatarëve të tij që gjenden në arrati.
Seanca që duhej të mbahej sot, anulua pasi njëri prej avokatëve, për shkak të problemeve shëndetësore nuk u paraqit në sallë, ndërsa seanca e radhës është caktuar më 5 mars, kur edhe bëhen 7 vite nga shpërthimi i minës në fshatin Sopot.

Banorët shprehen të revoltuar nga shtyrjet e seancave gjyqësore si dhe nga shtyrja e mbledhjeve të Komisionit anketues për mbrojtjen e të drejtave dhe lirive të njeriut, ku duhet të miratohen konkluzionet e raportit 200 faqesh të grupit parlamentar për rastin e Sopotit.

“Vëllezërit tanë po vuajnë dënimin, po i bëjnë 7 vjet më 5 mars dhe tash ne presim që të jetë kjo e fundit e marsit, të lirohen vëllezërit tanë prej burgut. Nëse nuk del drejtësia ne do të marrim të gjitha masat, do të shpërngulemi krejt para Qeverisë, s’kemi ku shkojmë më, 7 vite u bënë”, u shpreh Besnik Lutfiu – familjar i të burgosurve.
“Ja u bëjmë me dije se jemi këtu me e kërku drejtësinë, jemi të pafajshëm, le ta dinë të gjithë se jemi të pafajshëm... Na kanë lodhur me këto punë, duke vajtu fëmijët, familjet, të gjithë, sepse kur e bënë njeriu një punë atëherë duhet të pajtohet me të, po vallahi nuk e kemi bo..., tjetër nuk di çka të them. Unë besoj se ka me dal edhe atë shumë shpejt e drejta, nuk ka qare pa dal e drejta”, tha Nasuf Bekteshi – familjar i të burgosurve të Sopotit.

Përderisa në Gjykatën e Apelit po shtyhen seancat gjyqësore, në Kuvend ende nuk dihet se kur do të mbahet mbledhja e Komisionit anketues për mbrojtjen e të drejtave dhe lirive të njeriut, në të cilin pritet të miratohen konkluzionet e raportit 200 faqesh të grupit punues për rastin e Sopotit. (alsat-m)
Shtuar më 05/02/2010, ora 20:48
Tage: arkiv
Shkruani komentin tuaj!
Të fundit nga kjo kategori