Kryeministri Rama i është qasur në një formë tjetër çështjes së akuzave ndaj djalit të deputetit socialist Rrahman Rraja.

Ndryshe nga më parë kur akuzonte mediat dhe politikën se po baltosnin Rilindjen e tij, kësaj radhe Rama ka zgjedhur rrugën e të prekurit të zemrave të shqiptarëve me historinë e dhimbshme të deputetit Rraja, i cili sipas tij ndodhet pranë shtratit të spitalit me bashkëshorten e sëmurë.

“Sot, djali i një deputeti është në burg. Më vjen shumë keq për Rrahmanin, se po kalon një moment tejet të vështirë, pranë shtratit të spitalit ku e shoqja po lufton me vdekjen dhe natyrisht, edhe si baba, me një djalë që është aty ku e meriton të jetë”- tha Rama duke vijuar se nga pamjet e kamerave të komisariatit të Fushë-Krujës nuk duket të kenë qenë të pranishëm ditën kur bëhen akuzat as Taulant Balla dhe as Rrahman Rraja.