Përmes një statusi në fundit në rrjetin social Facebook, kryeministri Rama shprehet se ka marrë vlerësime për punën e qeverisë së tij gjatë takimit me ministrat e Jashtëm të vendeve anëtare të BE-së në Bruksel. Më tej ai nënvizon se ka marrë konfirmimin nga vendet anëtare, për hapjen e negociatave për anëtarësim.

"BRUKSEL: PERGEZIME SHQIPERISE

Sapo përfundoi në Bruksel mëngjesi i punës me vëndet anëtare, iniciuar nga grupi i Miqve të Shqipërisë në Këshillin e BE-së, ku u fol me tonet më pozitive për Raportin e Progresit dhe u konfirmua vullneti i vendeve anëtare për mbështetjen e rekomandimit pozitiv të Komisionit për çeljen e negociatave per anëtarësimin e Shqipërisë në Bashkimin Europian.

U nënvizua nga të gjitha vendet anëtare progresi i madh që pasqyrohet në Raportin e Komisionit; ecuria mbresëlënëse e reformave; respekti i veçantë për politikën rajonale të Shqipërisë; nevoja imediate për zbatimin e Ligjit të Vetingut si premisë e mirëkuptuar apo kusht i natyrshëm për ecurinë e këtij procesi historik.

Falenderim i veçantë për Shefen e Diplomacisë Europiane Federica Mogherini dhe për Komisionerin Johannes Hahn, dy miq të posaçëm e partnerë të çmuar të Shqipërisë në këtë proces", përfundon ai. /albeu.com/