Mega skandali, kush e garantoi firmën fantazëm se nuk do të zbulohej falsifikimi për 30 milion euro?
Ndryshe nga sa ministri Damian Gjiknuri përpiqet që ta relativizojë duke thënë se gjëra të tilla edhe ndodhin, skandali me dy tenderët me vlerë 30 milion euro të dhëna ndaj kompanisë fantazëm Dh Albania i kalon kufijtë e një vjedhjeje të trashë dhe ordinere me vula të falsifikuara.

Përmes falsifikimit të dokumenteve "DH Albania" arriti të marrë dy tenderë të mëdhenj nga institucionet në varësi të ministrisë së Infrastrukturës dhe Energjisë duke konfirmuar edhe njëherë se sa lehtshëm vidhen paratë e shqiptarëve.

Por, ndryshe nga sa përpiqet të thotë Gjiknuri dhe vartësit e tij, as administratori recepsionist 26 vjeçar i "DH Albania" dhe as pronari i vërtetë i kompanisë që fshihet pas tij nuk mund ta kenë planifikuar këtë mega aferë korruptive me kokën e tyre pa patur një garanci se çdo gjë do të shkonte sipas planit.

Kjo, sepse sipas detyrimeve ligjore për prokurimet publike, kompania ka derdhur në llogari të institucionit kontraktues, ASHRR dhe OST 10% të vlerës së punimeve në formën e garancisë së kontratës, Pra, kur ka hyrë në tender kompania ka derdhur rreth 1.8 milion euro për projektin e Unazës së Re dhe rreth 1.2 milion euro për atë të OST-së si garanci për kontratën.

Sipas rregullit, kjo garanci mbahet nga kontraktuesi nëse kompania nuk përbush detyrimet kontraktuale (siç edhe ndodhi).

Në këtë mënyrë, askush nuk do t'i kishte hyrë një aventure të tillë me falsifikime të trasha dokumentesh, me kosto 3 milion euro në total nëse nuk do të kishte patur një garanci se kjo aferë nuk do të zbulohej dhe këto para nuk do t'i sekuestroheshin sipas detyrimeve ligjore.

Eshtë e qartë si drita e diellit se "Dh Albania" ka patur një garantor për të gjithë këtë aferë në nivele të larta qeverisëse, në mos Ramën, Damian Gjiknurin, i cili asesi s'mund të bëjë veprime për vlera kaq të mëdha me kokën e tij. /albeu.com/
Shtuar më 12/12/2018, ora 18:10
Shkruani komentin tuaj!
Të fundit nga kjo kategori